Tiket sa semis nakataya sa banggaang SSC, UP
MANILA, Philippines – Mag-uunahan ang University of the Philippines at San Sebastian College-Recoletos na makuha ang ikatlong silya sa semifinals sa pagpapatuloy ng Shakey’s V-League Season 13-Collegiate Conference sa Philsports Arena sa Pasig City.
Nakatakda ang paghaharap ng Lady Maroons at Lady Stags sa alas-4 ng hapon habang target din ng Ateneo na masiguro ang tiket sa semis sa pakikipagtipan sa Far Eastern University sa alas-6 ng gabi.
Magkakasalo sa ikatlong puwesto ang Lady Stags, Lady Maroons at Lady Eagles hawak ang pare-parehong 2-2 marka.
Ang magwawagi sa pagitan ng UP at San Sebastian ang uusad sa Final Four kasama ang nagdedepensang National University (4-1) at FEU (3-1).
Awtomatikong masisikwat ng Lady Eagles ang ikaapat na puwesto sa semis kung magwawagi ito sa Lady Tamaraws.
Ngunit kung matalo ang Ateneo sa FEU, makakasagupa nito ang matatalo sa UP-San Sebastian game sa isang playoff para sa No. 4 slot.
Bigo ang Lady Maroons na makuha ang kanilang puwesto sa semis matapos yumuko sa Lady Bulldogs noong Lunes sa iskor na 25-23, 19-25, 24-26, 19-25.
Sa Spikers’ Turf Season Two-Collegiate Conference, magbabakbakan din ang FEU (3-1) at La Salle (3-1) para sa semis slot sa alas-10 ng umaga.
Nauna nang umabante sa susunod na yugto ang Ateneo (5-0) at NU (4-1).
- Latest
