35th PCA Open-Cebuana Lhuillier netfest: Arcilla-Joven tandem kampeon sa doubles
MANILA, Philippines – Nasungkit ng tambalang Johnny Arcilla at Ronard Joven ang kampeonato sa men’s doubles ng 35th Philippine Columbian Assocatiaon (PCA) Open-Cebuana Lhuillier men’s tennis tournament sa PCA indoor shell-clay court sa Paco, Manila.
Naging armas nina Arcilla at Joven ang pamilyaridad sa isa’t isa upang mabilis na payukuin sina Elbert Anasta at Mark Alcoseba, 6-3, 6-3, sa championship round na tumagal lamang ng isang oras.
“Unti-unti naming nakabisado ang galaw namin kaya alam na namin yung gagawin namin sa loob ng court. Naging madali yung adjustments namin dahil may sinusunod din kaming strategy,” wika ni Arcilla.
Naibulsa nina Arcilla at Joven ang P20,000 premyo habang nagkasya sa P10,000 konsolasyon sina Anasta at Alcoseba sa torneong suportado ng Philippine Star, Dunlop, Whirlpool-Fujidenzo, Chris Sports, Mary Grace, Aseana City, PVL Restaurant, Maverick, Compass, Babolat, Just Jewels, Rexona, Palm Rock, Coca Cola Femsa Philippines, Pearl Garden Hotel, Pearl Lane Hotel, Sen. Manny Pacquiao, L&M, Broadway Motors, Stronghold Insurance at Monte.
Bukod sa premyo, nakasiguro rin sina Arcilla at Joven ng tiket sa main draw ng PCA Open-Cebuana Lhuillier Asian Tennis Federation (ATF) Tour na gaganapin mula Setyembre 1 hanggang 4 sa parehong venue.
Kabilang sa mga tinalo nina Arcilla at Joven sina Ruben Santiago at Arn Procianos sa third round, 6-2, 6-2; Joshua Miranda at Dennis Vitaliano Jr. sa quarterfinals, 6-2, (retire); at Kim Saraza at Joseph Arcilla sa semifinals, 6-2, 6-4.
Nakasiguro ng opening-round bye sina Arcilla at Joven habang nabiyayaan ito ng walkover win sa second round.
Naglalaro naman sina Arcilla at Patrick John Tierro sa men’s singles finals habang sinusulat ang balitang ito.
- Latest
