Lim naghahanda na para sa US Open Juniors
MANILA, Philippines – Puspusan na ang paghahanda ni junior netter Alberto Lim Jr. na nakatakdang sumabak sa US Open junior tennis championship na magsisimula sa Setyembre 4 sa New York City.
Kasalukuyang sumasailalim sa pagsasanay si Lim sa Los Angeles Tennis Academy bilang bahagi ng preparasyon nito.
Hindi na lumahok pa si Lim sa ginaganap na PCA Open-Cebuana Lhuillier men’s tennis tournament upang maisentro ang kanyang isipan sa naturang Grand Slam event.
Magugunitang nagkampeon si Lim noong nakaraang taon sa PCA Open nang gulantangin nito si eight-time titlist Johnny Arcilla.
Hangad ni Lim na mas mapaganda ang kanyang kampanya sa US Open matapos makaabot sa third round ng French Open juniors noong Mayo.
Kabilang sa mga tinalo ni Lim sa French Open sina third seed Ulises Blanch ng Amerika, 6-3, 6-1, at Constantin Bittoun Kouzmine ng France, 6-1, 3-6, 6-2, bago natalo kay Marvin Moeller ng Germany, 6-2, 6-1.
Tiwala naman ang ama ni Lim na makapagbibigay ng magandang laban ang kanyang anak dahil malaki ang naitulong ng kanyang training camp sa Los Angeles.
Target ni Lim na makapasok sa Top 10 sa International Tennis Federation juniors ranking sa pagtatapos ng taon.
“He’s doing well in his training in LA as he intends to make it in the top 10 in the world rankings at the end of the year,” anang ama na si Alberto Lim.
- Latest
