China Open World 9-Ball Tourney: 4 pang Pinoy pasok sa knockout stage

MANILA, Philippines – Apat pang Pinoy ang umusad sa knockout stage ng 2016 China Open World 9-Ball tournament  na ginaganap sa Pudong Tangzhen Culture and Sports Center sa Shanghai, China.

Nakasiguro rin ng tiket si Jeffrey Ignacio matapos magtala ng dalawang sunod na panalo laban kina Gregory Harada, 9-3, at Francisco Sanchez-Ruiz sa Group E habang dumaan sa losers’ bracket sina Carlo Biado, Lee Vann Corteza at Alex Pagulayan bago makahirit ng puwesto sa main draw.

Ginapi ni Biado si Karl Boyes (9-3) sa Group E, namayani si Corteza kay Han Haoxiang (9-4) sa Group F at nanaig si Pagulayan kay Trung Le Quang (9-4) sa Group H sa kani-kanilang do-or-die games.

Makakasama nina Ignacio, Biado, Corteza at Pagulayan sa main draw sina Jeffrey De Luna at Johann Chua na nauna nang umabante sa knockout stage.

Pinayuko ni De Luna sina Yang Chingshun (9-6) at Ke Bing Yi (9-6) sa Group D habang nanalo si Chua kina Hussain Bashater Abdulmajeed (9-6) at Denis Grabe (9-7) sa Group C.

Sa women’s division, pasok din sa main draw sina two-time World 10-Ball champion Rubilen Amit at 2016 Amway Spring International Women 9-Ball Championship Chezka Centeno.

Pinatumba ni Amit si Gu Zhengqin, 7-1, sa Group F samantalang inilampaso ni Centeno si Choi Sollip, 7-2, sa Group C ng torneong may basbas ng World Pool-Billiard Association.

Bigo namang makapasok sina Southeast Asian Games gold medalist Dennis Orcollo at Warren Kiamco na lumasap ng dalawang sunod na kabiguan.

Natalo si Orcollo kina Wu Kunlin (4-9) at John Morra (5-9) gayundin si Kiamco kina Aloysius Yapp (8-9) at Thorsten Hohmann (7-9).

May kabuuang $373,­600 premyo ang ipamamahagi sa torneo tampok ang $40,000 sa men’s champion at $36,000 sa women’s titlist.