Arcilla, Tierro umabante sa semifinals ng PCA Open

MANILA, Philippines - Mabilis na pinataob nina top seed Johnny Arcilla at second pick Patrick John Tierro ang kani-kanilang karibal upang masiguro ang tiket sa semifinals ng 35th Philippine Columbian Association (PCA) Open-Cebuana Lhuillier men’s tennis tournament na ginaganap sa PCA indoor shell-clay court sa Paco, Manila.

Gamit ang malalim na karanasan, hindi nakaporma kay Arcilla ang dating junior campaigner na si Argil Lance Canizares, 6-0, 6-1, upang makalapit sa inaasam na ikasiyam na kampeonato.

Makakasagupa ni Arcilla si third seed Elbert Anasta na nagtala ng 6-4, 6-4, panalo laban kay Ronard Joven.

“One game at a time lang. Kailangan parating naka-focus dahil palakas na nang palakas ang mga kalaban habang tumatagal yung tournament. Beterano rin si Elbert kaya kailangan 100 percent ang ilabas mo sa laro,” wika ng 36-anyos na si Arcilla na nagkampeon noong 2001, 2006, 2007, 2008, 2009, 2011, 2012 at 2013.

Matikas din ang ratsada ni Tierro na umiskor ng 6-2, 6-3 panalo kay seventh seed Rolando Ruel Jr. sa torneong may basbas ng Philippine Lawn Tennis Association.

Titipanin ni Tierro sa Final Four si Filipino-Italian Marc Reyes na nagrehistro rin ng impresibong 6-2, 6-2 panalo kay Fritz Verdad.

Target din ni Tierro na maibalik sa kanyang teritoryo ang korona matapos itong agawin ni Alberto Lim Jr. noong nakaraang taon.

Hindi naipagtanggol ni Lim ang titulo nito sa taong ito dahil abala ang junior netter sa paghahanda para sa US Open juniors championship na magsisimula sa susunod na buwan sa New York City.

Sa men’s doubles, magkapares sina Arcilla at Joven na lalarga laban kina Kim Saraza at Joseph Arcilla sa unang semis game habang makakasama ni Tierro si Jed Olivarez Jr. kontra kina Anasta at Marc Anthony Alcoseba sa hiwalay na semis match.