Foton Pilipinas kinapos sa Bangkok Glass- Thailand
MANILA, Philippines - Nagbigay ng magandang laban ang Foton Pilipinas ngunit higit na lumutang ang malalim na karanasan ng Bangkok Glass-Thailand upang lasapin ang 20-25, 22-25, 25-20, 18-25 kabiguan sa 2016 Thailand Women’s Volleyball Championship na ginaganap sa Wi Sommai Gymnasium sa Sisaket Province, Thailand.
Maganda ang inilaro ng Tornadoes sa pagsisikap nina imports Ariel Usher, Lindsay Stalzer, Aby Maraño at Maika Ortiz na siyang umariba sa attack line katuwang si setter Rhea Dimaculangan.
Gamit ang bilis at karanasan, agad na nakakasagot ang Bangkok Glass sa bawat puntos ng Foton Pilipinas upang pigilan ang pagtatangka ng Pinay spikers na maipuwersa ang fifth set.
Nahulog sa 0-2 baraha ang Tornadoes sa Pool A.
Unang tinamo ng Foton Pilipinas ang 13-25, 10-25, 18-25 pagyuko kontra sa powerhouse Sisaket-Thailand noong Miyerkules.
Makakaharap ng Foton ang Rungsit University sa kanilang huling laro sa group stage ngayong araw sa alas-12:30 ng tanghali (oras sa Maynila).
Aminado si Italian head coach Fabio Menta na matinding kalaban ang mga Thais na malayo na ang narating sa mundo ng volleyball.
Umaasa si Menta na magagamit ng Tornadoes ang karanasang nakukuha nito sa Thailand meet upang higit na mapalakas ang kanilang koponan na naghahanda para sa 2016 Asian Volleyball Confederation (AVC) Asian Women’s Club Championship na idaros sa Setyembre 3 - 11 sa Biñan, Laguna. (CCo)
- Latest
