Phoenix, Tanduay magkakaalaman ngayon
MANILA, Philippines – Parehong ilalabas ng Phoenix at Tanduay ang naitatagong lakas nito upang masungkit ang kampeonato sa paglarga ng rubber match ng 2016 PBA D-League Foundation Cup best-of-three championship series ngayong hapon sa Alonte Sports Arena sa Biñan, Laguna.
Maghaharap sa huling pagkakataon sa kumperensiyang ito ang Accelerators at Rhum Masters sa alas-5 ng hapon.
Namayani ang Phoenix sa Game 1 (84-76) subalit naitabla ng Tanduay ang serye sa 1-1 matapos itagay ang 89-75 panalo sa Game 2.
Dahil sa panalo, nabuhayan ng loob ang Tanduay Masters kaya’t ayaw na nitong pakawalan pa ang tsansang masikwat ang unang titulo sa liga.
Aminado si Tanduay mentor Lawrence Chongson na mahirap kalaban ang Accelerators. Subalit tiwala ito sa kakayahan ng kanyang tropa na mauulit nito ang kanilang impresibong panalo sa Game 2.
“Phoenix is a dangerous animal. I would want nothing else but to win. It’s just our instinct to survive. We’re holding on to nothing but ourselves,” ani Chongson.
Nanguna para sa Rhum Masters si dating National University standout Gelo Alolino na nagpasabog ng 26 puntos ngunit inaasahang raratsada rin sa pagkakataong ito sina Reden Celda at Kevin Ferrer na ilan sa mga maaasahan ng tropa.
Babandera para sa Accelerators sina Mac Belo kasama sina Ed Daquioag at Roger Pogoy.
Magsisilbing motibasyon naman ni Mike Tolomia ang kanyang Conference MVP trophy upang makatulong sa tangkang masikwat ng Phoenix ang ikalawang sunod na korona.
Nagkampeon ang Phoenix sa Asipirants’ Cup noong Abril.
- Latest