Titans nagpalakas ng tsansa sa Final Four
MANILA, Philippines - Sinabon nang husto ng AMA Online Education ang Blustar Detergent, 113-84, upang manatiling buhay ang pag-asa sa Final Four ng 2016 PBA D-League Foundation Cup kahapon sa Ynares Sports Arena sa Pasig City.
Nailista ng Titans ang ikatlong panalo sa limang laro subalit daraan sa matinding pagsubok ang tropa bago makahirit ng puwesto sa semis dahil kinakailangan nilang maipanalo ang huling apat na laro.
“Record sa amin ito. Ngayon pa lang kami nakapanalo ng back-to-back games at nagkaroon pa kami ng chance sa semifinals,” sabi ni AMA Online coach Mark Herrera.
Nanguna para sa Titans si James Martinez matapos magtala ng 32 points tampok ang 5-of-13 shooting sa three-point area.
Nagdagdag naman si Rashawn McCarthy ng 24 markers, 7 rebounds at 5 assists, habang nagtala si Jay-R Taganas na 12 points at 16 rebounds kasama ang 5 assists.
Nagparamdam din si Ryan Arambulo na umiskor ng 16 puntos para sa Titans.
Nagpasabog ang AMA ng 13-0 run sa second quarter upang itarak ang 21 puntos na kalamangan, 48-27, laban sa Dragons.
Umabot pa sa 30 puntos ang abante ng AMA, 109-79, sa huling bahagi ng fourth quarter.
Sumandal ang Blustar kay Chun Hong Ting na nagsumite ng 21 points habang humugot si dating Ateneo standout Juami Tiongson ng 15 markers.
Naglista si Kuek Tian Yuan ng 14 points at 20 rebounds subalit hindi ito napakinabangan ng Dragons na lumasap ng ika-limang sunod na kabiguan.
- Latest