Bakers babawian ang Rhum Masters
MANILA, Philippines – Puntirya ng nangungunang Cafe France na makaresbak sa Tanduay sa kanilang muling paghaharap sa 2016 PBA D-League Foundation Cup elimination second round ngayong araw sa Ynares Sports Arena sa Pasig City.
Nakatakda ang ikalawang engkuwentro ng Bakers at Rhum Masters sa alas-6 ng gabi.
Bukod tanging ang Tanduay ang nakapagbigay ng kabiguan sa Café France kung saan pinangunahan ni Gelo Alolino ang 84-80 panalo ng Rhum Masters sa first round ng eliminasyon noong Hunyo 16.
Subalit mataas ang lebel ng laro ng Bakers sa pagkakataong ito matapos iselyo ang apat na sunod na panalo kabilang ang 96-93 overtime win laban sa Phoenix noong Huwebes.
Kasalukuyang hawak ng Bakers ang solong pamumuno tangan ang 7-1 rekord kasunod ang Racal at Phoenix na magkasosyo sa ikalawa bitbit ang parehong 7-2 marka. Ang Tanduay naman ay hindi nalalayo sa ikaapat tangan ang 6-3 baraha.
Madaragdagan ang bangis ng Tanduay sa pagpasok ni University of Santo Tomas standout Kevin Ferrer sa koponan na inaasahang tutulong upang mawalis ang huling tatlong laro ng Rhum Masters.
Sa unang laro, palalakasin ng AMA Online Education ang tsansa nitong makahirit ng puwesto sa Final Four sa pagsagupa sa Blustar Detergent sa alas-4.
- Latest
