Team USA nirapido ang Argentina sa exhibition game
LAS VEGAS — Bagong koponan. Parehong resulta.
Hitik ng bagong star power at nagdomina sa shaded lane, pinabagsak ng US men’s basketball team ang Argentina, 111-74, sa isang exhibition match bilang paghahanda sa 2016 Olympic Games sa Agosto.
Ipinakita ng US ang mas gumanda nilang shooting at conditioning.
“There’s a willingness from these guys to work on anything we need and to work hard,” sabi ni coach Mike Krzyzewski. “These are very good guys.”
Ang US team na hindi pa natatalo sa nakaraang 10 taon ay madaling nagpatumba sa Argentina, ikinukunsidera ng ilan bilang medal contender sa Rio Olympics.
Umiskor si Kevin Durant ng 23 points, habang may 18 si Paul George at 17 si Carmelo Anthony.
Bagama’t nagretiro na si Kobe Bryant at hindi naglaro si LeBron James ay inaasahan pa ring makakamit ng Team USA ang kanilang ikatlong sunod na gold medal sa Olympics.
Ipinarada ni Krzyzewski ang 10 bagong players.
“Nothing is for sure,” wika ni Durant. “We want to get this gold and right now we have a job to do. We have to prepare the right way.”
Ibilang na ang mga Argentines na kaagad bumilib sa unang laro ng US Olympic team.
“Obviously, they have the best talent and the best size in the world,” sabi ni Argentinian forward Luis Scola. “That’s a big difference in their favor.”
Ang laro laban sa Argentina ang una sa limang exhibition games na gagawin ng US bago magtungo sa Rio para idepensa ang kanilang gold medal.
Humakot si DeMarcus Cousins ng 15 rebounds sa loob lamang ng 16 minuto at dinomina ng US ang Argentina sa rebounding, 53-30.
“The big thing is getting in shape and they are not there where they will be,” ani Krzyzewski. “But we really have an inside presence on the boards.”
Pinamunuan ni Andres Nocioni ang Argentina, tinalo ng US sa semifinals ng 2012 Olympics, sa kanyang 15 points kasunod ang 11 ni Manu Ginobili.
- Latest
