Teodoro inilusot ang Jose Rizal
MANILA, Philippines - Naisalpak ni Tey Tey Teodoro ang game-winning jumper sa huling sandali ng laro upang hatakin ang Jose Rizal University sa 60-59 panalo laban sa Emilio Aguinaldo College kahapon sa NCAA Season 92 men’s basketball tournament sa The Arena sa San Juan City.
Hawak ng Generals ang kalamangan may limang segundo pang nalalabi, 59-58, nang mailusot ni Teodoro ang jumper laban kay Francis Munsayac upang makuha ng JRU ang bentahe.
May tsansa sana ang EAC na makuha ang panalo subalit nagmintis si Munsayac sa three-point territory para tuluyang ipaubaya sa Jose Rizal ang pananaig.
Umangat ang Heavy Bombers sa 2-3 rekord.
Humakot si Teodoro ng kabuuang 21 puntos, dalawang assists at dalawang steals habang sumuporta si Mark Cruz na nagtala ng 14 puntos para sa Jose Rizal.
Malaki rin ang nai-ambag nina Jordan Dela Paz, Abdoulad Poutouochi at Abdul Razak Abdulwahab na nagsanib-puwersa sa paghatak ng 36 sa kabuuang 63 rebounds ng Heavy Bombers.
Sa kabila ng panalo, hindi pa rin kuntento si Jose Rizal coach Vergel Meneses sa inilalaro ng kanyang bataan dahil naniniwala itong may ibubuga pa ang Heavy Bombers.
“I saw nothing positive in this victory, we’re still not in the level of Mapua and San Beda,” ani Meneses.
Nanguna naman para sa Generals si Sydney Onwubere na may 18 points, 19 rebounds at dalawang blocks katuwang si Cameroonian Hamadou Laminou na may 14 points, 14 boards at walong blocks.
Nalimitahan si Munsayac sa apat na puntos sa 21 minutong paglalaro matapos ang masamang 2-of-12 field goal shooting kabilang ang ilang krusyal na error sa laro.
Ganito rin ang nagawang pagkakamali ni Munsayac nang matalo ang EAC sa Allwell Oraeme-less Mapua, 57-60, noong nakaraang linggo.
Dahil dito, gumulong sa 1-4 ang Generals. (CCo)
Jose Rizal 60- Teodoro 21, Cruz 14, Grospe 6, Dela Paz 5, Abdul Wahab 4. Poutouochi 4, Evardo 2, Lasquety 2, Mendoza 2, Astilla 0, dela Virgen 0, Pontejos 0.
EAC 59- Onwubere 18, Laminou 14, King 7, Serrano 7, Guzman 6, Munsayac 4, Morada 3, Corilla 0, Mendoza 0, Pascua 0.
Quarterscores: 19-10; 29-30; 45-44; 60-59.
- Latest
