Giyera sa semis hahataw na
MANILA, Philippines – Hangad ng top seed Air Force na maipagpatuloy ang kanilang magandang ratsada laban sa Laoag habang muling magtutuos ang Pocari Sweat at Bali Pure sa pagsisimula ng Shakey’s V-League Season 13 Open Conference best-of-three semifinals ngayong araw sa The Arena sa San Juan City.
Nakuha ng Jet Spikers ang unang puwesto sa semis matapos dispatsahin ang Pocari Lady Warriors, 20-25, 25-17 25-22, 25-15, noong Lunes kaya’t mataas ang kumpiyansa nito bago humarap sa Power Smashers sa alas-4 ng hapon.
Ngunit maganda rin ang inilalaro ng Laoag na buhat naman sa 25-21, 19-25, 25-22, 26-24 pananaig kontra sa University of the Philippines na siyang naging daan upang masikwat ang huling tiket sa semis.
Hawak din ng Laoag ang karangalan bilang tanging koponang nakatalo sa Air Force sa eliminasyon, 25-14, 25-23, 25-23.
At magandang motibasyon ito para sa Jet Spikers na makabawi sa pagkakataong ito.
“We’re going to use that as motivation when we play them in the semis,” ani Air Force coach Jasper Jimenez na aasa kina Jocemer Tapic, Joy Cases, Judy Ann Caballejo, May Ann Pantino at Wendy Anne Semana.
Tatapatan ito nina Mylene Paat, Jessica Galanza, Jovielyn Prado, Katherine Villegas, Wenneth Eulalio at Chie Saet para sa Power Smashers.
Gayunpaman, sesentro ang spot light sa muling pagtutuos ng Pocari Sweat at Bali Pure matapos ang kanilang five-set marathon sa eliminasyon kung saan nanaig ang Lady Warriors.
Aarangkada para sa Pocari Sweat sina Myla Pablo at Elaine Kasilag na siyang nagdala sa kanilang koponan sa panalo laban sa Bali Pure habang makakatuwang ng dalawang open hitters sina Michele Gumabao, Desireee Dadang, Gyzelle Sy at Melissa Gohing.
Sa Spikers’ Turf semis, magtatagpo ang No. 1 Cignal at No. 4 Sta. Elena sa alas-10 ng umaga kasunod ang duwelo ng No. 2 Air Force at No. 3 Instituto Estetico Manila sa ala-una ng hapon.
- Latest
