Lions, Cardinals sosyo sa unahan
MANILA, Philippines – Pinasadsad ng San Beda College at Mapua Institue of Technology ang kani-kanilang karibal para pagsaluhan ang liderato kahapon sa NCAA Season 92 men’s basketball tournament sa The Arena sa San Juan City.
Isang krusyal na three-pointer ang pinakawalan ni Davon Potts para tulungan ang Red Lions na itarak ang 91-86 panalo laban sa Lyceum of the Philippines University.
Humataw ang US NCAA Division II transferee na si Potts ng 19 puntos tampok ang 12 sa fourth quarter habang nagdagdag si team captain Roldan Sara ng 14 puntos, limang rebounds, limang assists at dalawang steals habang may double-double na 11 puntos at 13 rebound si Jayvee Mocon.
Umiskor din ng pinagsamang 22 puntos sina Donald Tankoua at Arnaud Noah para sa San Beda na sumulong sa 2-0 rekord.
Nanguna sa panig ng Lyceum si Wilson Baltazar na nagtala ng 24 puntos subalit hindi ito sapat para isalba ang kanyang tropa na nalaglag sa 0-2 panimula.
Sa kabilang banda, iginupo ng Mapua ang College of Saint Benilde Blazers, 78-68, para ihatid ang Cardinals sa ikalawang sunod na panal.
Gaya ng inaasahan, muling umariba si MVP-Rookie of the Year Nigerian Allwell Oraeme nang kumana ito ng 17 puntos, humatak ng 21 rebounds at umani ng dalawang blocks para sa Cardinals.
Nakabalik naman sa porma ang nagdedepensang Colegio de San Juan de Letran na tinuhog ang Emilio Aguinaldo College, 76-72, kung saan rumatsada si Rey Nambatac ng career-high 33 points sa huling laro.
“A win is a win although it is not a good win but I would like to thank the players for refusing to lose until the endgame,” wika ni Letran coach Jeff Napa na nakakuha rin ng 17 puntos mula kay John Quinto.
Sumulong sa 1-1 ang Letran na lumasap ng 85-89 kabiguan sa San Beda sa opening day noong Sabado.
Nawalan ng saysay ang double-double na 23 points at 18 rebound ni Cameroonian Hamadou Laminou para sa Generals na nalaglag din sa 1-1 marka.
San Beda 91- Potts 19, Sara 14, Noah 12, Mocon 11, Tankoua 10, Bolick 8, Presbitero 7, Navarro 2, Soberano 2, Adamos 0.
LPU 86- Baltazar 24, Nzeusseu 18, Ayaay 12, Marata 11, Alanes 9, Serafico 4, Alban 4, Bulawan 2, Soliman 2.
Quarterscores: 20-16; 42-40; 64-all; 91-86.
Mapua 78 - Oraeme 17, Isit 15, Estrella 12, Orguina 7, Serrano 6, Meninan 5, Raflores 4, Victoria 4, Biteng 3, Bunag 3, Magboo 2.
CSB 68 - Young 20, Fajarito 12, Domingo 10, Saavedra 8, Sta. Maria 7, Haruna 5, Leutcheu 3, Dixon 2, Castor 1, Pasamante 0, San Juan 0.
Quarterscores: 14-18; 35-30; 56-43; 78-68.
- Latest
