Arum gustong isabong si Pacquiao kay Lomachenko

MANILA, Philippines - Kahit anong gawin ay hindi pa talaga mapapakawalan ni promoter Bob Arum ang retirado nang si Sen. Manny Pacquiao.

Sa isang panayam ng www.boxingscene.com ay sinabi ni Arum ng Top Rank Promotions na plano niyang ilaban si Pacquiao kay WBO junior lightweight champion Vasyl Lomachenko ng Ukraine sa susunod na taon.

Ito ay kung magbabago ang isip ng 37-anyos na Filipino world eight-division champion na nagretiro noong Abril 9 makaraang talunin si Timothy Bradley Jr. sa kanilang ‘trilogy’.

Matapos makuha ang isang posisyon sa Senado sa nakaraang National Elections ay sinabi ni Pacquiao na tapos na ang kanyang boxing career at tanging pag-uukulan na lamang ay ang kanyang trabaho.

“Well we gotta see. If he will fight this year, then he will fight next year. We are thinking about him fighting in October if he wants to fight,” wika ni Arum kay ‘Pacman’.

Sakaling magbago ang isip ni Pacquiao ay kaagad paplantsahin ni Arum ang laban nito sa 28-anyos na si Lomachenko, isang two-time Olympic at World Amateur gold medalist.

“Once I get the opponent that I am working on -- we are working on opponents and once I get that, I will fly over to the Philippines and he will see if his schedule in the senate allows him to train for a fight and participate in a fight,” sabi ni Arum.

Binugbog ng Ukranian fighter si Roman Martinez ng Puerto Rico sa loob ng limang rounds para iposte ang 7-1 win-loss ring record tampok ang apat na knockouts.

Tiniyak ni Arum na lubos na tatangkilin ang bakbakan nina Pacquiao at Lomachenko.