Korona ng PSL Challenge Cup nakatakdang pag-agawan ngayon
MANILA, Philippines – Magkakaalaman na kung sino ang magrereyna sa 2016 Philippine Superliga Challenge Cup beach volleyball competition sa pagpalo ng semifinals at finals ngayong araw sa SM By the Bay sa Mall of Asia sa Pasay City.
Magtutuos sa unang semis game ang Petron XCS nina Aiza Maizo-Pontillas at Bang Pineda at RC Cola-Army nina Jovelyn Gonzaga at Nerissa Bautista sa alas:11:15 ng umaga kasunod ang laban nina Bernadeth Pons at Kyla Atienza ng Far Eastern University kina Cherry Ann Rondina at Patty Orendain ng Foton sa alas-12:15 ng tanghali.
“Kailangan naming ma-minimize ‘yung errors namin dahil semis na ito. Mas mabigat na ang laban. Iyong communication namin kailangan parating nandun para alam namin ang magiging galaw namin sa loob ng court,” wika ni Gonzaga na nagmamay-ari ng tatlong Nestea Beach Volley National Finals titles.
Ang mga magwawagi sa semis ang siyang uusad sa finals na lalaruin sa alas-5:30 ng hapon, habang ang mga matatalo ay lalaban sa battle-for-third sa alas-4:15.
Aarangkada rin ang semis sa men’s division tampok ang pukpukan ng Philippine Navy-B nina Pajiji Alsali at Milover Parcon, at Team Volleyball Manila nina Kris Roy Guzman at Anthony Arbasto sa alas-9 ng umaga kasunod ang duwelo nina Madsairi Buramin at Roldan Medino ng Philippine Navy-A at nina Joel Cabayan at Franco Camcam ng Far Eastern University-A.
Ang finals sa men’s side ay idaraos sa alas-3:15 ng hapon.
Maliban sa semis at finals, nakatakda rin ang classification round sa umaga na magsisimula sa alas-7:30.
- Latest
