Cavs tatapusin na ang Raptors

TORONTO-- Muli na namang nahaharap sa pader ang Raptors.

Nagtala ang Raptors ng 32-9 record sa kanilang home court sa regular season at may 8-2 marka sa playoffs matapos ipanalo ang Game 7 laban sa In­diana at Miami.

“We’ve got to play the same way we played the two home games we’ve had so far,” pahayag ni Raptors guard Kyle Lowry, umiskor ng 13 mula sa 5 of 12 shooting sa Game 5.

“That’s all we can do. Can’t worry about the road. We might not get a chance to go back on the road if we don’t play the right way tomorrow,” dagdag pa ni Lowry.

Natalo ang Toronto sa kanilang tatlong laro sa Quicken Loans Arena sa pinagsamang 88 points.

Ngayon ay magbabalik ang Raptors sa kanilang balwarte sa Air Canada Centre para sa Game 6 kung saan may 0-4 record ang Cavs ngayong season at naisuko ang Games 3 at 4 sa serye.

Inilapit ni LeBron James at ng Cleveland Cavaliers ang kanilang sarili para sa ikalawang sunod na NBA Finals nang gibain ang Toronto, 116-78, sa Game 5 noong Miyerkules.

Pinamunuan ni Kevin Love na may 25 points at tig-23 nina James at Kyrie Irving, nagtala ang Cavs ng 43-point lead sa second half para gibain ang Raptors.

Itatrato ni Cavaliers’ head coach Tyronn Lue na Game 7 ang kanilang laban ng Raptors.

“We want to come in with the approach that this is our Game 7,” wika ni Lue. “We’ve worked hard all season to get to this point, and we want to treat this next game as our Game 7.”