2016 Vietnam Open Karatedo Championship: Pinoy karatekas isinalba ni Vasquez
MANILA, Philippines - Bumanat pa ng isang ginto, isang pilak at tatlong tanso ang national karatedo team sa pagpapatuloy ng 2016 Vietnam Open Karatedo Championship na ginaganap sa Thanh Hoa Sport Training and Competition Center sa Thanh Hoa province sa Vietnam.
Nagpasiklab sa pagkakataong ito si John Enrico Vasquez na naghari sa cadet male kata division upang maibigay ang ikalawang gintong medalya ng Pilipinas sa naturang torneo na nilahukan ng 11 bansa.
Tinalo ng 2015 Thailand Open Karate-Do Championships bronze medalist na si Vasquez ang kanyang dalawang karibal mula sa Vietnam sa iskor na 3-0 sa semifinals at 3-2 sa finals.
“We are happy that our young athletes are performing well in this competition. These are the future of Philippine karatedo. We are exposing them in international competitions to further hone their skills for future big tournaments,” pahayag ni Philippine Karatedo Federation Secretary General Raymund Lee Reyes.
Nakasiguro naman ng pilak na medalya si Randy Stefano Padua Jr. sa individual kumite male 76 kgs. junior habang ang tatlo pang tanso ay nai-ambag nina Leigh Angela Cuadra sa female individual kumite junior (59 kgs.), Andrei Mel Dela Cruz sa male individual kumite cadet at Angel Aguilar female individual kumite junior (-53 kgs.).
Sa kabuuan, mayroon nang dalawang ginto, tatlong pilak at apat na tanso ang Pilipinas sa torneong nilahukan din ng Malaysia, Thailand, Hong Kong, Japan, South Korea, Indonesia, Macau, Laos at host Vietnam.
Sa unang araw ng kumpetisyon, nakaginto si Jaime Enrique Villegas (male individual kata junior).
- Latest
