Rosario top pick sa PSL Rookie Draft?
MANILA, Philippines – Tunay na nagningning si dating NCAA MVP Christine Joy Rosario ng Arellano University sa ginanap na 1st Philippine Superliga (PSL) Rookie Camp sa The Arena sa San Juan City.
Ipinamalas ng 6-foot-1 middle blocker ang kanyang husay sa harap ng mga team owners at coaches na personal na nanood sa camp.
Dahil dito, iisa ang tinig ng mga coaches na si Rosario ang posibleng maging top overall pick sa gaganaping PSL Annual Rookie Draft sa Biyernes sa SM Aura sa Taguig City.
Minsan nang naglaro si Rosario sa Petron kaya’t kung papiliin ito, nais niyang maging bahagi ng Tri-Activ Spikers.
“Hindi naman ako nag-e-expect kasi mahirap masaktan. Okay lang kahit anong posisyon sa draft. Kung papalarin, gusto ko sana mag-stay sa Petron. Pero if ever, kahit anong team okay lang sa akin,” wika ni Rosario na nakababatang kapatid ni Troy Rosario na itinanghal na second pick sa PBA Rookie Draft noong nakaraang taon.
Dumating din sa rookie camp si dating UAAP MVP Ara Galang ng De La Salle University gayundin sina Mary Grace Berte ng Holy Cross of Davao, Shirley Salamagos, Danna Henson at Angel Legacion ng Arellano, Asi Soliven ng National University at sina Marlyn Llagoso at Jerra Mae Pacino ng Southwestern University-Cebu.
“I think she’s (Rosario) ready for the big league. She’s the consensus top overall pick. Everybody wants to draft her. Personally, I also want her for my team. But I will be picking sixth pa so medyo malabo. Whoever drafts her will be very lucky. She’s the middle blocker of the future,” pahayag ni camp director Sammy Acaylar ng Cignal.
Nanood sa camp sina coaches Kungfu Reyes ng RC Cola-Army, George Pascua ng Petron, Francis Vicente ng Generika, Ramil de Jesus ng F2 Logistics, Nene Ybanez ng Standard Insurance-Navy, Ken Moleno ng Perpetual at Don Dulay ng Foton.
Unang pipili sa draft ang RC Cola-Army kasunod ang Generika, Perpetual, Standard Insurance-Navy, F2 Logistics, Cignal, Petron at Foton.
- Latest
