Fil-German netter tinuhog ang 2 korona

MANILA, Philippines – Winalis ni Filipino-German Marc Sieber ang korona sa singles at doubles ng 2016 Turkey Futures - Tennis Organization Cup na ginanap sa Belconti Resort Tennis Courts sa Antalya, Turkey.

Mabilis na dinispatsa ni Sieber ang second seed Belgian bet na si Christopher Heyman sa finals sa bendisyon ng 6-3, 6-0 panalo upang masungkit ang kanyang ikatlong sunod na titulo sa singles sa naturang International Tennis Federation (ITF) Futures event.

Nasiguro ng 28-anyos netter ang tiket sa finals matapos patumbahin sina Katsuki Nagao ng Japan sa first round, 6-2, 6-1; Issel Okamura ng Japan sa second round, 5-7, 6-2, 6-0; Remi Boutillier ng France sa quarterfinals, 7-6 (11), 6-1 at Ryota Kishi ng Japan sa semifinals, 6-0, 7-5.

Sa doubles, nakipagsanib-puwersa si Sieber kay Christoph Negritu ng Germany upang irehistro ang pukpukang 6-4, 6-7 (1), 12-10 panalo sa finals laban kina Italians Alessandro Bega at Lorenzo Frigerio.

Kabilang din sa mga pinayuko nina Siber at Neg­ritu sina Alex Blumenberg ng Brazil at Joel Cannell ng England sa first round (6-2, 6-3), Altug Celikbilek at Sefa Suluoglu ng Turkey sa quarterfinals (2-6, 6-1, 10-5) at sina Katsuki Nagao at Hiromasa Oku ng Japan sa semifinals (6-3, 7-5).

Nauna nang naibulsa ni Sieber, na ang kanyang ina ay mula sa Cagayan de Oro City, ang korona sa singles event ng 2016 International Tennis Federation Turkey Futures na ginanap noong nakaraang buwan.

Nakapaglaro na si Sieber sa Pilipinas kung saan nagkampeon ito sa 2010 edisyon ng Philippine Columbian Association (PCA) Open tennis tournament sa Paco, Manila.