Kahit sino ‘di kami namimili ng kalaban - Yeng
MANILA, Philippines - Hindi mamimili ng kanilang kakalabanin si Rain or Shine head coach Yeng Guiao para sa best-of-seven championship series ng 2016 PBA Commissioner’s Cup.
Sinabi ni Guiao, iginiya ang Elasto Painters sa pang-anim na finals appearance matapos sibakin ang San Miguel Beermen, 3-1, sa kanilang best-of-five semifinals series, na paghahandaan nila ang sinuman sa Alaska Aces at Meralco Bolts sa Finals.
“Bahala silang magpatayan,” ani Guiao sa bakbakan ng Alaska at Meralco sa Game Four kagabi.
Kumpiyansa si Guiao na makakamit ng Rain or Shine ang kanilang ikalawang PBA championship matapos magkampeon noong 2012 PBA Governor’s Cup.
Nakita ito ni Guiao sa inilaro ng mga Elasto Painters laban sa Beermen sa kanilang semifinals showdwn.
Pinatumba ng Rain or Shine ang San Miguel sa Game Four, 124-99, sa kabila ng muling paghugot ni coach Leo Austria kay import Arizona Reid bilang kapalit ni Tyler Wilkerson para tapusin ang kanilang serye sa 3-1.
“San Miguel Beer is very strong. We pulled off a big upset,” sabi ni Guiao sa Beermen na nauna nang kinuha ang Game Three, 104-98, bagama’t naglaro nang wala si Wilkerson.
“It’s a great feeling to be back in the finals especially beating a team like San Miguel Beer with AZ Reid as import,” sabi ni Guiao. “We lost to them last year. I was worried but I knew AZ didn’t have the legs and is not in shape. It’s really the best time for us to beat them.”
Tinalo ng Beermen ang Elasto Painters sa 2015 Governors Cup semifinals, 1-3 at sa nakaraang Philippine Cup Final Four, 2-4.
- Latest
