Air Force, 3 pa pasok sa semis
LINGAYEN, PANGASINAN, Philippines – Pinangunahan ng Air Force team nina Jennifer Manzano at Judy Caballejo ang apat na koponang pumasok sa semifinals matapos magposte ng malinis na 3-0 record upang pangunahan ang Manila teams sa eliminations ng Pistay Dayat beach volleyball competition kahapon na ginaganap sa Capitol beachfront dito.
Kasama ng AirForce team na pumasok sa semifinals ang defending champion tandem nina Jessa Aranda at Jonafer San Pedro para sa dalawang araw na kompetisyon na main event ng festival na idinaraos bilang pasasalamat sa masaganang yaman na mula sa karagatan.
Ginamit nina Manzano at Caballejo ang malawak na karanasan sa paglalaro sa Shakey’s V-League at Philippine Superliga para sa Air Force upang makarating sa semifinals matapos talunin ang RTU, 21-18; PUP team nina Javen Sabas at Rhea Fermilan, 21-14 at Mandaluyong team nina Jonella Mae Oribello at Jannelle Marie Labasan, 21-7 sa Manila vs Pangasinan tournament na ito na ginamitan ng double elimination format kung saan ang koponang matatalo ng dalawang beses ay sibak.
Matapos yumukod sa Air Force, ginamit naman nina Aranda at San Pedro ang kanilang championship experience upang talunin ang Mandaluyong, 21-7 at PUP, 21-14
Pasok na rin sa semis ang LGU Lingayen Team na may 3-0 kartada kasama ang Pangasinan State University matapos talunin ang Dagupan tandem nina Lourdes dela Cruz at Ma. Lyn Mahilum, 21-18 para sa 2-1 record.
- Latest