Beach volley eeksena sa Pista’y Dayat Festival

MANILA, Philippines - Muling magiging bahagi ng selebrasyon ng  Pista’y Dayat Festival ang isang beach volleyball competition sa pagdaraos ng dalawang araw na torneo sa Capitol beachfront sa Lingayen, Pangasinan.

Kabuuang sampung koponan ang kasali, limang teams mula sa Manila at limang teams mula sa Pangasinan ang maglalaban-laban para sa ikaanim na edisyon ng kompestisyong ito na nagsisilbing main event ng Pista’y Dayat.

Kabilang sa mga dadayong beach volleybelles ay sina Rhea Fermilan-Javen Sabas, Shaira Hermano/Niella Ramilo, Mariebet Resonda-Julie Ann Jose, Jennifer Manzano-Judy Caballejo at Jessa Aranda-Jona San Pedro.

Ang Pista’y Dayat ay thanksgiving festival na idinaraos ng Lingayen, Pangasinan para sa masaganang ani mula sa karagatan.

Bukod sa beach volleyball, mayroon ding Car Motor Show sa umaga at paboksing sa hapon kahapon.

Magkakaroon din ng Sand Sculpting Competition ngayon at Limgas na Pangasinan Pageant Night sa gabi.

Idaraos naman ang Skateboarding Competition bukas, Search for Mr. & Mrs Beach Body, Pop Fiesta at Night Job Market bilang pagdiriwang ng Labor Day.