So nakuntento sa 2nd sa US meet
MANILA, Philippines - Nagkasya sa ikalawang puwesto si Grandmaster (GM) Wesley So sa prestihiyosong 2016 US Chess Championship na ginanap sa Chess Club and Scholastic Center of Saint Louis sa Missouri, USA.
Nakakolekta ng kabuuang 7.5 puntos si So na nabuo mula sa apat na panalo at pitong draws.
Tinalo nito sina GM Gata Kamsky (first round), International Master Akshat Chandra (second), GM Varuzhan Akobian (fifth) at GM Alexander Shabalov (seventh).
Ang kanyang mga draw ay nakuha laban kina GM Fabiano Caruana (third), GM Samuel Shankland (fourth), 2015 champion GM Hikaru Nakamura (fifth), GM Alexander Onischuk (eighth), GM Jeffrey Xiong (ninth), GM Ray Robson (10th) at GM Aleksandr Lenderman (11th).
Sa katunayan, kasosyo ni So sa No. 2 si Nakamura na nakakuha rin ng parehong 7.5 puntos. Subalit lamang ang Pinoy chess wizard sa tiebreak upang makuha ang runner-up trophy.
Nagkampeon si Caruana na umani ng 8.5 puntos galing sa anim na panalo at limang draws.
Napasakamay ni Caruana ang tumataginting na $50,000 premyo habang hindi naman uuwing luhaan si So na nagkamit ng $35,000 konsolasyon.
Nakubra rin ni Nakamura ang $25,000.
Nasa ikaapat lamang si Robson na nakalikom ng pitong puntos kasunod sina Onischuk (anim na puntos), Xiong (5.5), Kamsky (5.0), Lendermand, Shankland at GM Varush Akobian (4.5), Shabalov (4.0) at Chandra (1.5). (CCo)
- Latest
