Florida State taekwondo championship: 2 gold, 1 silver kay Domingo
MANILA, Philippines - Walang kakupas-kupas si dating Southeast Asian Games champion Veronica Domingo-Ryu nang sumipa ito ng dalawang ginto at isang pilak na medalya sa 2016 Florida State Taekwondo Championships na ginanap sa Double Tree By Hilton Hotel sa Florida, USA.
Humataw muna ng ginto si Domingo-Ryu sa women’s ultra sparring bago nakipagsanib-puwersa kay Michael John Bugarin para angkinin ang isa pang gintong medalya sa mixed pair poomsae senior 2 event.
Sumiguro rin ng pilak si Domingo-Ryu sa women’s individual poomsae senior 2 sa event na nilahukan ng mahigit 200 jins.
“Who would have thought that I would have the nerve to compete in Poomsae as everyone knows that she is very lousy and poor on it? It was my first time to compete in poomsae as a taekwondo athlete and I’m happy of what I’ve achieved,” wika ni Domingo-Ryu.
Kamakailan lamang, kumana rin ng ginto si Domingo-Ryu sa US Open Taekwondo Championships na ginanap sa Reno-Sparks Convention Center sa Nevada kung saan nagtala ito ng 7-1 panalo laban kay American Jan Riedisser sa finals ng women’s ultra +67-kilogram division.
Kasalukuyang naninirahan si Domingo-Ryu sa Amerika kasama ang kanyang Koreanong asawa.
Ibinabahagi nito ang kanyang malalim na karanasan sa mga batang jins sa pamamagitan ng ilang serye ng clinics at training camps.
Magugunitang nakapag-uwi ng tansong medalya si Domingo-Ryu sa 2002 Asian Games sa Busan, South Korea at 2006 Asian Games sa Doha, Qatar.
Wagi rin ito ng ginto sa SEA Games noong 2001 sa Malaysia at 2003 sa Vietnam. (CCo)
- Latest
