Gabi ng mga atleta ngayon
MANILA, Philippines - Ito na ang gabing pinakahihintay ng mga atletang nagpakitang-gilas sa nakaraang taon.
Papagitna ang mga bayani at mga bituin sa Philippine sports ng nagdaang taon sa pagdaraos ng Philippine Sportswriters Association (PSA) ng Annual Awards Night na inihahandog ng Milo at San Miguel Corp.
Ang dalawang world boxing champions at isang rising golf star na nagkampeon sa nakaarang Asian Tour circuit ang babandera sa mahabang listahan ng mga awardees na pararangalan ngayong gabi sa One Esplanade sa Pasay City.
Pormal na ibibigay kina World Boxing Organization (WBO) super-bantamweight title holder Nonito Donaire Jr., long-time WBO light-flyweight champ Donnie Nietes at Asian Tour winner Miguel Tabuena ang PSA Athlete of the Year award mula sa pinakamatandang media organization sa bansa sa ilalim ni president Riera Mallari, ang sports editor ng The Standard.
Ito ang ikaapat na pagkakataon na tatanggapin ng 33-anyos na si Donaire ang PSA Athlete of the Year award na ibinibigay ng sportswriting fraternity sa mga karapat-dapat na mga atleta matapos noong 2007, 2011 at 2012, habang ito naman ang una para sa 33-anyos na si Nietes at sa 21-anyos na si Tabuena.
Kabuuang 111 awardees ang pararangalan sa event na pamamahalaan nina Quinito Henson at Patricia Bermudez-Hizon bilang host sa programang magsisimula sa alas-7:30 ng gabi at itinataguyod ng Philippine Sports Commission (PSC) bilang major sponsor at suportado ng Smart, MVP Foundation, Maynilad, Philippine Amusement and Gaming Corp., Philippine Basketball Association, Philippine Charity Sweepstakes Office/Philracom, Accel, Sen. Chiz Escudero, SM Prime Holdings, Rain or Shine, Globalport, National University at One Esplanade.
Bibigyan din ng rekognisyon ang Gilas Pilipinas national cage team sa pamamagitan ng President’s Award at si Alaska chief executive officer and president Wilfred Uytengsu Jr. bilang Executive of the Year.
Si Uytengsu, dating miyembro ng national swimming team at ngayon ay aktibong triathlete, ang tatayong guest speaker ng two-hour formal rites.
Bibigyan naman ng citations ang mga gold medalists ng 28th Southeast Asian Games at ASEAN Para Games, habang ang walong namayapang naging bahagi ng Philippine sports ay tatanggap ng posthumous awards.
- Latest