Lady Troopers balik-aksyon sa PSL Invitational Cup

MANILA, Philippines – Muling masisilayan ang magaganda at matitikas na volleyball players sa bansa sa paghataw ng 2016 Philippine Superliga (PSL) Invitational Cup sa Pebrero 18 sa The Arena sa San Juan City.

Magbabalik-aksiyon ang three-time champion Philippine Army na dadalhin ang RC Cola habang lalarga rin ang Foton, Cignal at Petron gayundin ang baguhang F2 Logistics at New San Jose Builders, Inc.

Mangunguna sa kampanya ng Lady Troopers sina Tina Salak, Nerissa Bautista, Honey Royse Tubino, Michelle Carolino at Jovelyn Gonzaga kasama si Rachel Anne Daquis.

Nawala naman sa ha­nay ng Toplanders sina middle blocker Jaja Santiago at setter Ivy Perez na kasalukuyang naglalaro sa University Athletic Association of the Philippines (UAAP) subalit nakuha nito sina Angeli Tabaquero, Rhea Dimaculangan at Maika Ortiz.

Ang Cignal naman ay kukuha ng lakas kina Holy Cross of Davao College ace Mary Jane Berte, Southwestern University hotshot Marlyn Llagoso, at Djanel Cheng, Jeanette Panaga at Janine Navarro ng National Collegiate Athletic Association (NCAA) champions College of Saint Benilde.

Makikilala bilang Tri-Activ Spikers, ang Petron ay sasandal kina Aiza Maizo-Pontillas, Bang Pineda at dating NCAA Most Valuable Player CJ Rosario. Wala sa lineup ng Petron si Dindin Santiago-Manabat dahil sa kanyang pagbubuntis.

Pamumunuan naman nina Cha Cruz at Paneng Mercado ang Cargo Movers kasama sina Pau Soriano, Lilet Mabbayad, Chie Saet at Danika Gendrauli samantalang ang Victorias ay aasa kina University of Perpetual Help stars Coleen Bravo at Lourdes Clemente.

Isang malakas na koponan mula sa Thailand ang isasama ng PSL sa semifinals upang higit na pataasin ang lebel ng kumpetisyon.