Texters lalabanan ang Elite na wala ang kanilang import
MANILA, Philippines – Sa kanilang tune-up game pa lamang ng Blackwater noong Enero 30 ay muling ipinakita ni Talk ‘N Text import Ivan Johnson ang kanyang pagiging siga.
Itinulak ni Johnson sa mukha si 6-foot-8 center JP Erram bago sinuntok si forward Frank Golla sa naturang laro na nagresulta sa kanyang one-game suspension at multang P50,000.
Dahil dito ay hindi makakalaro ang 6-foot-8 na si Johnson sa unang pagdedepensa ng korona ng Tropang Texters laban sa Elite ngayong alas-4:15 ng hapon sa 2016 PBA Commissioner’s Cup sa Smart Araneta Coliseum.
Sa ikalawang laro sa alas-7 ng gabi ay magsusukatan naman ng lakas ang Star Hotshots at ang Meralco Bolts.
Sa kabila ng pagkakaroon ng magaspang na kilos ay walang plano ang Talk ‘N Text na humanap ng kapalit ni Johnson, naglaro sa NBA para sa Atlanta Hawks.
Ngunit walang nakakaalam kung kailan ‘puputok’ si Johnson na tanging nakontrol lamang ng Tropang Texters noong nakaraang taon sa pamamagitan ni team captain Jimmy Alapag, nagretiro noong 2015 PBA All-Star Game at hinugot ng Meralco.
Sa pag-upo ni Johnson ay aasahan ni coach Jong Uichico sina top two rookies Moala Tautuaa at Troy Rosario bukod pa sa mga beteranong sina Jayson Castro, Kelly Williams, Ryan Reyes at Harvey Carey.
Nagpapagaling naman ng kanyang back injury si 6’5 power forward Ranidel De Ocampo matapos ang isang aksidente habang nagbubuhat ng barbell sa kanilang weight training sa pagsisimula ng nakaraang PBA Philippine Cup.
Inaasahang sasamantalahin ng Blackwater ni mentor Leo Isaac ang kawalan ng reinforcement ng Talk ‘N Text sa pagpaparada kay si 6’9 import MJ Rhett.
Noong nakaraang PBA Philippine Cup ay nakuha ng Elite ang huling silya sa quarterfinals matapos sibakin ang Bolts at Mahindra Enforcers.
Samantala, muling aasahan ng Star si PBA Best Import Denzel Bowles sa pagsagupa sa Meralco na itatapat si Arinze Onuako, pumalit sa may injury na si Malcom Thomas.
- Latest