6 gintong medalya nilangoy ng PSL tankers sa Tokyo meet

TOKYO - Kaagad nagparamdam ng puwersa ang Philippine Swimming League (PSL).

Ito ay matapos sumisid ng anim na gintong medalya ang mga manlalangoy ng PSL sa pagsisimula ng 2016 Tokyo Winter Swimming Championship na ginaganap sa St. Mary’s International School swimming pool dito.

Pinangunahan nina Marc Bryan Dula ng Weisenhei­mer Academy, Micaela Jasmine Mojdeh ng Immaculate Heart of Mary College-Parañaque at Joey Del Rosario ng De La Salle-Zobel ang kampanya ng Pilipinas matapos humakot ng tig-dalawang gintong medalya.

Pinagharian ni Dula ang labanan sa boys’ 8 years 25-meter backstroke matapos ilista ang 19.41 segundo kasunod ang pagkopo ng gintong medalya sa 25m butterfly sa bilis na 17.83 segundo.

Rumatsada rin si Mojdeh sa girls’ 9-10 category nang itarak ang tiyempong isang minuto at 19.47 segundo para masungkit ang ginto sa 100m butterfly.

Nangibabaw din siya sa 100m breaststroke tangan ang impresibong 1:31.96 oras.

Hindi nagpahuli si Del Rosario na namayagpag sa boys’ 8 years 25m freestyle kung saan nairehistro niya ang 16.76 segundo, kapos lamang ng 0.50 segundo upang matabunan sana ang dating rekord na 16.16 ni Olympian Miguel Molina noong 1993.

Nasungkit ni Del Rosario ang kanyang ikalawang gintong medalya sa nilahukang 50m freestyle sa bilis na 35.44 segundo.

“We’re overwhelmed with the performance of these young tankers Marc, Jasmine and Joey. They’re too close to breaking records in their respective events including Joey who’s just 0.50 of a secondo of Molina’s record and they’re swimming in a cold weather (one degree),” wika ni PSL president Susan Papa.

Maliban sa anim na ginto, nakasiguro rin ang PSL ng tatlong pilak at tatlong tansong medalya sa nasabing swimming invitational.

Nag-ambag ng pilak si Drew Benett Magbag ng University of the Philippines (UP) Integrated School sa boys’ 15-over 100m breaststroke (1:08.73) na pinagha­rian ni FINA World Junior Championship veteran Joshua Brown ng St. Mary’s International School-Japan (1:04.68) gayundin si Lans Rawlin Donato ng UP na sumegunda sa boys’ 15-over 100m butterfly (59.26).

Ang ikatlong pilak ay galing kina Magbag, Donato, Sean Terence Zamora ng University of Santo Tomas at Martin Jacob Pupos ng National University sa boys’ 15-over 400m medley relay (4:05.15).

Ang mga tanso ay mula kina Zamora (boys’ 15-over 50m freestyle, 25.27), Lowestein Julian Lazaro ng Philippine Yuh Chiau School (boys’ 13-14 100m backstroke, 1:16.30) at Jux Keaton Solita ng UST (boys’ 15-over 400m freestyle, 4:23.85).

“I’m happy to see all of them performing well despite the cold weather. I am positive that we will be able to surpass our eight-gold medal prediction earlier,” wika ni Papa.

“We are looking forward to win more gold medals in the next events that we’ll be participating,” dagdag pa ng swimming academy chief sa kanilang mga lalahukan pang events sa ibang bansa.