Archers o Wildcats?
Laro Ngayon
(The Arena, San Juan City)
5 p.m. NCBA vs La Salle
MANILA, Philippines - Magtutuos sa huling pagkakataon ang La Salle Archers at NCBA Wildcats at ang magwawagi ay magpapatuloy pa ang kampanya sa Spikers’ Turf Collegiate Conference.
Ang playoff ay magsisimula ngayong alas-5 ng hapon sa The Arena sa San Juan City at tiyak na magiging mainit ang labanan at hindi malayong umabot sa limang sets ang bakbakan dahil sa kahalagahan ng makukuha ng mananalo.
Magkasalo sa 3-4 ang Archers at Wildcats at ang magwawagi ang siyang makakalaban ng walang talo na Ateneo Eagles sa best-of-three semifinals na sisimulan sa Lunes.
Ang playoff ay dapat gagawin sa Setyembre 7 pa pero minabuti ng Sports Vision na gawin na ito ngayon upang hindi masira ang kanilang iskedul at pumayag din ang magkabilang koponan sa pagbabago.
Ang pumapangalawang National University at Emilio Aguinaldo College ang magkikita sa isa pang laro sa semifinals.
Natalo sa apat na sets ang Archers sa Generals pero sinuwerte pa sila dahil nabigo ang NCBA sa talsik ng UP Maroons na namayani sa five-sets sa larong ginanap noong Miyerkules.
Gagamitin ng La Salle bilang motibasyon ang pagkakaroon pa ng pagkakataon na lumaban para sa huling tiket sa susunod na yugto sa ligang handog ng PLDT Home Ultera.
- Latest