Gilas giniba ang Japan

Laro Ngayon

1 p.m.  Gilas Pilipinas vs Iran

3 p.m.  New Zealand vs Japan

5 p.m.  Taipei B vs Korea

7 p.m.  Russia vs Taipei A

TAIPEI – Napaganda ang kondisyon ng Gilas Pilipinas matapos ang pisikal na laro sa huling asignatura para mamayani ang koponan sa Japan, 75-60, sa 2015 Jones Cup sa Xinchuang Gymnasium.

“The bonding from the battle (against Russia) may have flowed to the spirit of the team,” wika ni Gilas coach Tab Baldwin. “The team is enjoying a great spirit. They’re enjoying each other’s company. Off-court chemistry is flowing on the court.”

Si Terrence Romeo ay humataw uli para sa Natio­nals sa kanyang 16 puntos habang sina Jayson Castro, Ranidel de Ocampo at rookie Moala Tautuaa ay may tig-10 puntos para sa Gilas  na dinurog ang Japan sa huling yugto, 29-16.

Bagamat bagito, dalawang beses na dinakdakan ni Tautuaa ang 6’10” center ng Japan habang sina Castro, De Ocampo, Gary David at Gabe Norwood ay nagpakawala ng limang triples para pagningasin ang mainit na pagtatapos.

“Our second half (against Japan) was the best basketball we’ve played. In the first half, we played good defense. In the second half, we did a good job on both sides of the floor,” dagdag  pa ni Baldwin.

May 3-1 karta ang Pilipinas at may dalawang dikit na panalo at ang momentum ay kanilang magagamit dahil kalaban nila ngayon ang lider na Iran (3-1).

Hindi pinaglaro ni Baldwin sina Asi Taulava, Sonny Thoss, Dondon Hontiveros at Jimmy Alapag para sa inaasahang mahirap na laro laban sa Iran.

Mabagsik ang inaasa­hang laro na ipakikita ng Iranians matapos nilang lasapin ang unang pagkatalo laban sa US, 66-81.

Hindi pinaglaro ng Iran si 7’2” center Hamed Haddadi laban sa US kaya’t tiyak na hahataw ito kontra sa Nationals.

Masaya si Baldwin sa naipakita ng Gilas sa mga naunang laro pero marami pa silang dapat gawin kung ang pag-uusapan ay ang pagsungkit ng titulo sa FIBA Asia.

GILAS PILIPINAS 75 – Romeo 16, Tautuaa 10, De Ocampo 10, Castro 10, Norwood 9, David 8, Intal 3, Pingris 3, Rosario 2, Ganuelas 2, Ramos 0.

JAPAN 60 – Takeuchi 15, Hiejima 12, Furukawa 6, Tabuse 6, Kanamaru 5, Mitsuhara 4, Hirose 2, Arao 2, Hachimura 0, Hashimoto 0.

Quarterscores: 11-10, 29-25, 46-44, 75-60.