Taulava at Romeo bagong hugot sa Gilas
MANILA, Philippines - Dumating ang mga inimbitahan ni head coach Tab Baldwin para sa ensayo ng training pool ng Gilas Pilipinas noong Miyerkules ng gabi sa Meralco Gym.
Kabilang sa mga sorpresang inanyayahan ni Baldwin ay sina one-time PBA Most Valuable Player Asi Taulava ng NLEX, Globalport scoring guard Terrence Romeo, Barako Bull big guard JC Intal at National University Bulldogs star Jeth Troy Rosario.
Si Rosario ay naging player ni Baldwin sa Gilas Cadets na nag-uwi ng gold medal mula sa 28th Southeast Asian Games sa Singapore.
Ang iba pang dumating ay sina Jayson Castro at Ranidel de Ocampo ng Talk ‘N Text, Gary David ng Meralco, Aldrech Ramos ng NLEX, Sonny Thoss at Dondon Hontiveros ng Alaska at Matt Ganuelas-Rosser ng Talk ‘N Text.
Tanging si De Ocampo ang hindi sumali sa ensayo ng grupo at sa halip ay nanood lamang sa bench.
Sina Castro, De Ocampo at David ay bahagi ng Gilas PIlipinas na sumabak sa 2014 FIBA World Cup sa Spain matapos makuntento sa silver medal noong 2013 FIBA Asia Championships na idinaos sa Mall of Asia Arena sa Pasay City.
Hindi naman dumalo sina back-to-back PBA Most Valuable Player June Mar Fajardo ng San Miguel, Marc Pingris ng Star, LA Tenorio ng Ginebra, Paul Lee at Jefff Chan ng Rain or Shine.
Sinabi nina Fajardo at Pingris na may mga injury sila, habang idinahilan ni Tenorio ang pagkakaroon ng ‘fatiguie’.
Hindi naman malinaw kung hindi pinayagan ng Elasto Painters sina Lee at Chan.
Sinabi ni Baldwin na ihahayag niya at ng Samahang Basketbol ng Pilipinas ang Final 12 ng Gilas Pilipinas sa Lunes.
Pinaghahandaan ng Gilas Pilipinas ang pagsabak sa 2015 FIBA Asia Championship sa Setyembre 23 hanggang Oktubre 3 sa Changsha, China.
Ang nasabing torneo ang masisilbing regional qualifier para sa 2016 Olympic Games sa Rio de Janeiro, Brazil.
Dapat maghari ang Nationals sa FIBA Asia Championships para masikwat ang nag-iisang tiket patungo sa 2016 Rio Olympics.
Huling nakapaglaro ang Pilipinas sa Olympics noong 1972 Games sa Munich.
Samantala, naniniwala si SBP executive director Sonny Barrios na tutuparin ni naturalized player Andray Blatche, sinasabing ayaw bigyan ng release papers ng kanyang Chinese team, ang kanyang kontrata sa SBP.
Ang 6-foot-11 na si Blatche ang kumamada para sa Gilas Pilipinas ni mentor Chot Reyes noong 2014 FIBA World Cup.
Sinabi ni Barrios na inihahanap na ng kanyang matitirhan si Blatche sa bansa.
- Latest
