Pacquiao pababagsakin agad si Mayweather

MANILA, Philippines – Hindi matatapos ang 12 rounds at itataas ni Manny Pacquiao ang kanyang mga kamay sa Mayo 2 sa MGM Grand sa Las Vegas, Nevada.

Ito ang deklarasyon ni chief trainer Freddie Roach kaugnay sa kanyang paniniwala na mapapabagsak ni Pacquiao si Floyd Mayweather Jr. na nabigong gawin ng naunang 47 boksingerong nakalaban nito.

“I think Manny will win by knockout. I don’t have a round but the thing is, we have to break him down first and I think in the later rounds, I believe Manny will knock him out,” wika ni Roach sa panayam ng On The Ropes Boxing Radio.

Ang knockout power ng 36-anyos na si Pacquiao ay nanggagaling sa kanyang malalaki at matitigas na mga binti.

Kaya naman bumili si Roach ng isang anti-inflammatory cream na nagkakahalaga ng $1,800.00 (P80,800.00) para ipahid sa mga binti ni Pacquiao at makaiwas sa leg cramps sa aktuwal na laban nila ng 38-anyos na si Mayweather.

“His legs are his biggest strength because I feel like he can move a lot better than Floyd can. I think Mayweather’s gonna have trouble with the side to side movement,” ani Roach.

Ipinatigil na ni Roach ang pagpapatakbo kay Pacquiao sa bundok ng Griffin Park at sa halip ay binigyan si ‘Pacman’ ni strength and conditioning coach Justin Fortune ng ilang leg exercises.

Tungkol naman kay Mayweather, sinabi ni Roach na alam na niya ang bawat galaw nito sa loob ng boxing ring.

“Mayweather is very fast. His favorite punch is the jab to the body; I think the punch is a little bit too long, I know how to beat that punch if he does it. He might get knocked out right there,” sabi ni Roach. “He reaches a lot with his punches and he’s always pulling away as he’s throwing a punch forward.”

Hindi rin nababahala ang Team Pacquiao sa ginagawang pagsisibak ng kahoy ni Mayweather na isa sa bahagi ng kanyang pagsasanay at sa halip ay ginawa itong katatawanan ni Pacquiao.

“Maybe he’ll cook rice. Maybe he’s going to cook, that’s why he’s chopping wood,” wika ni Pacquiao.