Sinu-sino ang magpapatuloy pa?
MANILA, Philippines - Pagsisikapan ng Café France Bakers at Jumbo Plastic Giants na huwag masayang ang magandang ipinakita sa elimination round kontra sa mga determinadong katunggali sa ‘ikaw-o-ako’ na labanan sa pagtatapos ngayon ng PBA D-League Aspirants’ Cup quarterfinals sa The Arena sa San Juan City.
Ang Giants ay makikipagsubukan uli sa Cebuana Lhuilier Gems sa ganap na alas-2 ng hapon bago sundan ng pagkikita ng Bakers at Bread Story-Lyceum Pirates dakong alas-4 ng hapon at ang mananalo ang siyang aabante sa semifinals.
Pinalad ang Bakers at Giants na tumapos sa ikatlo at apat na puwesto sa single-round elimination kaya’t nakuha nila ang twice-to-beat advantage upang manatiling nakatayo kahit natalo sa pagsisimula ng quarters noong nakaraang Huwebes.
Nangapa ang Bakers sa dating matikas na porma para isuko ang 72-79 pagkatalo habang naubos ang Giants sa huling yugto sa 53-63 pagluhod sa Gems.
“We need to play tough defense especially against their shooters if we want to advance into the semifinals,” wika ni Jumbo Plastic coach Stevenson Tiu na balak ang ikalawang sunod na paglalaro sa Final Four.
Naghihintay ang walang talong Cagayan Valley Rising Suns at Hapee Fresh Fighters sa semis na paglalabanan sa isang best-of-three series.
- Latest
