Tigresses sinolo ang third spot
MANILA, Philippines - Inangkin ng UST Tigresses ang ikatlong puwesto nang pabagsakin ang FEU Lady Tamaraws, 25-19, 25-21, 25-23, sa 77th UAAP women’s volleyball kahapon sa The Arena, San Juan City.
Ito ang ikaapat na sunod na panalo ng Tigresses tungo sa 5-5 baraha matapos bumangon mula sa 21-23 agwat sa third set.
May 16 kills tungo sa 17 puntos si Ennajie Laure, habang sina Pamela Lastimosa, Carmela Tunay at Marivic Meneses ay naghatid ng 12, 9 at 8 hits para sa UST.
Nagdagdag ng 10 kills si Lastimosa at ang kanyang pangalawang tapik ang bumasag sa 23-all iskor bago ibinigay ni Tunay ang panalo sa isang down-the-kill spike.
May 4-6 karta ngayon ang Lady Tamaraws at si Jerrilli Malabanan ang nanguna sa koponan sa kanyang 6 hits.
Tinapos ng Adamson Lady Falcons ang apat na sunod na kabiguan sa 25-15, 25-22, 25-18 panalo laban sa UE Lady Warriors sa naunang laro.
Sina Amanda Villanueva, Mylene Paat at Jessica Galanza ay may 13,11 at 11 hits para sa Lady Falcons na sinaluhan ang FEU at National University Lady Bulldogs at UP Lady Maroons para sa mahalagang ikaapat hanggang ikapitong puwesto sa 4-6 karta.
Ang Lady Warriors ay may 0-10 baraha.
- Latest
