Arum itsapuwera muna para matuloy ang Pacquiao-Mayweather fight
MANILA, Philippines - Handa na sina Filipino world eight-division champion Manny Pacquiao at American world five-division titlist Floyd Mayweather, Jr. na plantsahin ang kanilang laban nang wala si promoter Bob Arum.
Matapos ang ilang minutong pag-uusap sa halftime ng laban ng Miami Heat at Milwaukee Bucks sa Miami, Florida ay pinuntahan ni Mayweather si Pacquiao sa hotel suite nito sa Miami.
Ipinakita ng 37-anyos na si Mayweather ang kanyang sinseridad na matuloy ang kanilang mega showdown ng 36-anyos na si Pacquiao.
Hindi binanggit ni Michael Koncz, ang Canadian adviser ni Pacquiao, kung isinama nina Pacquiao at Mayweather sa kanilang usapan si Arum ng Top Rank Promotions.
Ang malinaw lamang ay handa ang mga opisyales ng mga networks na HBO at ng Showtime/CBS na gawin ang Pacquiao-Mayweather super fight sa Mayo 2 sa MGM Grand sa Las Vegas, Nevada.
Nagkausap na sina CBS/Showtime Chairman Leslie Moonves at HBO Chief Executive Richard Plepler at nagkasundo na magkakaroon ng dalawang broadcasters ang Pacquiao-Mayweather fight.
Si Pacquiao ay nasa HBO, habang si Mayweather ay may exclusive contract sa Showtime/CBS.
Ang bawat network ay maglalagay ng isang hour-long show para sa kani-kanilang mga fighter at hindi na kailangang gamitin ang “24/7” show ng HBO maging ang “All-Access” ng Showtime.
“With ‘24/7’ and ‘All-Access,’ I don’t believe either are necessary,” ani Koncz. “This is not a normal boxing match, these two guys are superstars, as they showed just by meeting courtside at the basketball game.”
Kasama ni Mayweather na bumisita kay Pacquiao si Showtime Executive Vice President Stephen Espinoza.
“Floyd pledged to get it done and get everyone on the same page,” sabi ni Espinoza.
- Latest
