Lady Eagles kumakaway sa semis tigresses nanggulo sa standings
Laro sa Sabado
(The Arena, San Juan City)
8 a.m. Ateneo vs NU (M)
10 a.m. UST vs Adamson (M)
2 p.m. Ateneo vs UP (W)
4 p.m. NU vs La Salle (W)
MANILA, Philippines – Gumawa ng season-high 30 hits si Alyssa Valdez para pangunahan ang 25-21, 17-25, 25-14, 22-25, 15-10, panalo ng nagdedepensang kampeon Ateneo Lady Eagles sa Adamson Lady Falcons sa 77th UAAP women’s volleyball kahapon sa Mall of Asia Arena sa Pasay City.
Naipamalas ng Lady Eagles ang katatagan nang bumangon sa 2-4 iskor sa fifth set at nagawa pang ipanalo para isulong ang malinis na karta sa 9-0.
Isang panalo na lamang ang kailangang gawin ng koponan para pormal na pumasok sa Final Four.
May 24 kills si Valdez habang sina Amy Ahomiro at Ella de Jesus ay may tig-12 hits. Sina Isabelle de Leon at Jhoana Louisse Maraguinot ay may tig-siyam na puntos para sa Ateneo na nanalo kahit may 33 errors.
“Hindi maganda ang communication namin ngayon. Gaya ng inasahan ko, bibigyan kami ng Adamson ng magandang laban,” wika ni Valdez.
Ito ang ikaapat na sunod na pagkatalo ng Adamson para bumaba sa ikapitong puwesto sa 3-6 karta.
Ginulo ng UST Tigresses ang labanan para sa ikatlo at apat na puwesto nang talunin ang National University Lady Bulldogs, 25-22, 25-19, 25-18, sa unang laro.
Magandang pagtutulungan ang naipakita ng UST para sungkitin ang kanilang ikatlong sunod na panalo kasabay sa pagpapalasap ng Lady Bulldogs ng ikalawang dikit na kabiguan matapos ang dalawang sunod na panalo sa pagrenda ng bagong coach na si Roger Gorayeb.
Dahil dito ang UST at NU ay magkakasalo kasama ng pahingang UP Lady Maroons at FEU Lady Tamaraws sa ikatlo hanggang ikaanim na puwesto sa 4-5 baraha. (AT)
- Latest