Hawks sinilo ang 15-sunod na panalo
ATLANTA -- Ipinoste ng Hawks ang kanilang pang-15 sunod na panalo, ang kanilang pinakamahabang winning streak sa franchise history.
Huwag asahan na nanamnamin nila ito ng matagal.
Nakatutok sila kung sino ang nasa harapan nila.
Umiskor si Paul Millsap ng 22 points, habang nagdagdag ng 17 si Jeff Teague para sa 103-93 panalo ng Hawks laban sa Oklahoma City Thunder.
Patuloy ang pananalasa ng Atlanta na hindi inaasahang magiging isang title contender sa pagsisimula ng season.
Tangan ngayon ng Hawks ang kanilang Eastern-best record na 36-8.
Apat na starters ang umiskor sa double figures at si backup point guard Dennis Schroder ang nanguna sa kanilang arangkada sa fourth quarter.
Tumapos siya na may 13 points at 5 assists.
Pinamunuan ni Russell Westbrook ang Thunder sa kanyang 22 points, habang may 21 si Kevin Durant at 13 si Serge Ibaka.
Sa Oakland, California, nagtala si Klay Thompson ng record na 37-point third period performance para igiya ang Golden State Warriors sa 126-101 paggiba sa Sacramento Kings.
Ang Warriors ngayon ang may hawak ng pinakamaraming iniskor sa isang yugto.
Tumapos si Thompson na may career-high na 52 points, tampok dito ang league-record na siyam na 3-point shots sa isang yugto.
Sa iba pang resulta, nanaig ang Toronto Raptors sa Philadelphia, 91-86; tinalo ng Cleveland Cavaliers ang Charlotte Hornets, 129-90; nalusutan ng Miami Heat ang Indiana Pacers, 89-87; giniba ng New York Knicks, ang Orlando Magic, 113-106; pinayuko ng Chicago Bulls ang Dallas Mavericks, 102-98; hiniya ng New Orleans Pelicans ang Minnesota Timberwolves, 92-84 at pinisak ng San Antonio Spurs ang L.A. Lakers, 99-85.
- Latest