3rd win dadagitin ng Lady Eagles vs Lady Tams
Laro Ngayon
(Smart Araneta
Coliseum)
8 a.m. UST
vs Ateneo (M)
10 a.m. NU
vs La Salle (M)
2 p.m. FEU
vs Ateneo (W)
4 p.m. NU vs UP (W)
MANILA, Philippines - Masusukat ang katatagan ng nagdedepensang Ateneo Lady Eagles sa pagsukat sa FEU Lady Tamaraws sa pagpapatuloy ng 77th UAAP women’s volleyball ngayon sa Smart Araneta Coliseum.
Unang laro sa ganap na alas-2 ng hapon at balak ng Lady Eagles na makuha ang ikatlong sunod na panalo para solohin ang liderato sa walong koponang liga.
Winalis ng Ateneo ang National University Lady Bulldogs at Adamson Lady Falcons sa kanilang unang dalawang laro ngunit tiyak na mapapalaban sila sa Lady Tamaraws na umani ng straight sets panalo sa UP Lady Maroons.
Parehong may mga beteranang manlalaro ang magkabilang koponan kaya’t inaasahang magiging mahigpitan ang tagisan.
Si Alyssa Valdez na siyang leading scorer matapos ang dalawang laro sa kinamadang 43 puntos, kasama ang 33 kills, ang mangunguna sa Ateneo habang sina Michelle Morente, Julia Morado, Amy Ahomiro at Ella de Jesus ang magbibigay ng suporta upang manatiling malinis ang kanilang karta.
Sa kabilang banda, si Bernadeth Pons ang magdadala sa laban ng Lady Tamaraws matapos ang 14 kills at isang service ace na naitala kontra sa UP.
Tutulong din ang iba pang beterana tulad nina Remy Joy Palma at Geneveve Casugod para mapantayan ang 2-0 baraha ng La Salle Lady Archers.
Ang ikalawang laro dakong alas-4 ng hapon ay sa pagitan ng National University Lady Bulldogs at UP Lady Maroons na parehong mag-uunahan sa paglista ng kanilang unang panalo.
May dalawang talo na ang NU at kakailanganin nila na may tumulong sa pambatong manlalaro na si Jaja Santiago na number three scorer sa liga sa naitalang 26 kabuuang puntos mula sa 24 kills at dalawang blocks.
Gagawin din ang aksyon sa kalalakihan sa umaga at pakay ng nagdedepensang kampeon NU Bulldogs ang ikatlong sunod na panalo laban sa La Salle Archers na magsisimula matapos ang pagkikita ng UST at Ateneo sa alas-8 ng umaga. (ATan)
- Latest
