Alaska, San Miguel Beer ‘di bibitaw sa top spot
MANILA, Philippines - Habang patuloy ang pagtatala ng panalo ng Beermen at ng Aces ay lalo pang lumalakas ang kanilang pag-asang mahablot ang dalawang outright semifinals seat.
Sasagupain ng San Miguel ang Meralco ngayong alas-7 ng gabi matapos ang pakikipagharap ng Alaska sa NLEX sa alas-4:15 ng hapon sa 2014-2015 PBA Philippine Cup sa Smart Araneta Coliseum.
Nasa isang four-game winning streak ngayon ang Beermen ni coach Leo Austria, habang target ng Aces ni Alex Compton ang kanilang ikalawang dikit na panalo.
Kasalukuyang magkasalo sa liderato ang San Miguel at ang Alaska sa magkapareho nilang 7-1 rekord kasunod ang Rain or Shine (6-2), Ginebra (5-3), Talk ‘N Text (5-3), nagdedepensang Purefoods (5-3), Meralco (4-4), Globalport (4-5), NLEX (3-5), Barako Bull (3-6) at mga sibak nang Kia (1-8) at Blackwater (0-9).
Nagmula ang Beermen sa 95-69 paglampaso sa Globalport Batang Pier, 95-69, noong Martes.
“I told the players that we need to win three of our last four games para mas maganda ang chance namin sa Top Two,” sabi ni Austria. “I think this is a good step.”
Sa naturang panalo ay itinala ni PBA Most Valuable Player June Mar Fajardo ang kanyang pang-walong sunod na double-double mula sa hinakot niyang 17 points at 13 rebounds.
Nanggaling naman ang Bolts ni Norman Black sa 74-77 kabiguan sa nagdedepensang Purefoods Hotshots noong Linggo.
Sa ikalawang laro, asam ng Aces ang kanilang dalawang sunod na panalo matapos talunin ang Batang Pier, 87-84 noong Sabado sa Cagayan De Oro City.
Nakalasap naman ang Road Warriors ng 93-95 pagkatalo sa Rain or Shine Elasto Painters noong Martes.
- Latest
