Taulava diniskaril ang debut ni Pringle

MANILA, Philippines – Nagpakita ang ‘three-headed monster’ ng Batang Pier.

Ngunit sa huli ay ang 41-anyos na tinaguriang ‘The Rock” ang nagbida para sa Road Warriors.

Nagdomina sa shaded lane ang 6-foot-9 na si Fil-Tongan Asi Taulava sa dulo ng fourth quarter para tulu­ngan ang NLEX sa 101-96 panalo laban sa Globalport sa 2014 PBA Philippine Cup kagabi sa Smart Araneta Coliseum.

Humakot si Taulava ng 21 points, 8 rebounds at 5 assists para sa come-from-behind win ng Road Warriors, nilamangan ng Batang Pier ng 10 puntos sa first half.

Mula sa 76-70 abante sa third period ay kinuha ng Globalport ni coach Pido Jarencio ang kanilang huling kalamangan sa 92-88 sa 2:44 minuto ng final canto mula sa three-point shot ni Terrence Romeo, isa sa ‘three-headed monster’ na sinasabi ni team owner Mikee Romero kasama sina No. 1 overall pick Stanley Pringle at Alex Cabagnot.

Nagsalpak si Nino ‘KG’ Canaleta ng isang tres kasunod ang three-point play ni Taulava kay Nonoy Baclao para sa 94-92 bentahe ng NLEX sa huling 1:42 minuto.

Muling tumipa si Canaleta ng tres para sa 97-92 abante ng Road Warriors, hinawakan ni assistant coach Adonis Tierra, bago idikit ni  Mark Isip ang Batang Pier sa 94-97 sa 1:04 minuto ng laro.

Sinelyuhan ni Taulava ang panalo ng NLEX mula sa kanyang basket sa natitirang 41.9 segundo.

Samantala, sisimulan ng Purefoods, dating San Mig Coffee, ni Tim Cone ang pag­dedepensa sa kanilang titulo sa pagharap sa Alaska ni Alex Compton ngayong alas-7 ng gabi sa Big Dome.

Sa unang laro sa alas-4:15 ng hapon ay lalabanan naman ng Meralco ni coach Norman Black ang Barako Bull ni Koy Banal.

NLEX 101 - Taulava 21, Cardona 20, Ramos 16, Villanueva 11, Borboran 9, Canaleta 8, Villanueva 8, Raymundo 5, Camson 2, Villarias 1, Poligrates 0, Apinan 0, Baloria 0.

Globalport 96 - Romeo 33, Cabagnot 23, Pringle 14, Buenafe 6, Nabong 6, De Ocampo 6, Baclao 4, Isip 2, Jensen 2, Taha 0, Duncil 0, Ponferada 0, Cabrera 0.

Quarterscores: 25-29; 47-53; 70-76; 101-96.