Unang medalya asam ng mga wushu artists
INCHEON, South Korea – Sa ikatlong araw ng Asian Games posibleng maganap ang unang malaking selebrasyon sa hanay ng Pambansang delegasyon.
Ito ay dahil ang mga sanda artists na sina Jean Claude Saclag, Francisco Solis at Divine Wally ay magtatangkang bigyan ng medalya ang Pilipinas na hangad higitan ang 3 gold, 4 silver at 9 bronze medals na naiuwi noong 2010 sa Guangzhou, China.
Nasa quarterfinals na ang tatlong manlalaro.
Katunggali ni Saclag si Hendrik Tarigan ng Indonesia sa men’s -60-kilogram event.
Si Solis ay mapapalaban kay Ting Hong Wong ng Hong Kong sa men’s -56kg., habang si Wally ay makikipagtuos naman kay Kim Hyebin ng Korea.
Kung papalarin ang nabanggit na wushu experts, sila ay papasok sa semifinals at makakatiyak na ng medalya para sa Pilipinas.
Nanggaling si Saclag sa 2-0 panalo kay Lin Tun Kyaw sa unang laban at sasandalan din niya ang karanasanang nakuha noong nakatanso sa 2013 World Championships sa Kuala Lumpur, Malaysia kontra kay Tarigan na pinagpahinga si Helal Ali Mohammed Alhajj ng Yemen.
Si Solis ay umani rin ng 2-0 panalo laban kay Ur Rehmans Shams ng Pakistan, habang si Wong ay may ganito ring iskor kay Lee Wei Loong ng Malaysia.
Galing naman si Wally sa 2-0 pananaig kay Ho pero mapapalaban siya kay Kim na bukod sa pambato ng host country ay nag-bye rin sa first round at sariwang haharap sa Filipina sanda player.
- Latest
