Khan kumpiyansang mananalo si Pacquiao kontra kay Algieri

MANILA, Philippines - Ilang beses silang nagkasama sa training camp.

At alam ni dating world light welterweight titlist Amir Khan ang kakayahan ni Filipino world eight-division champion Manny Pacquiao.

Sinabi ni Khan na tiyak na ang panalo ni Pacquiao laban kay American challenger Chris Algieri sa Nobyembre 22 sa The Ve­netian sa Macau, China.

“It is a good fight. Pacquiao is a good friend of mine. Algieri is a good bo­xer but I don’t think he’s got the tools to beat  Manny Pac­quiao,” sabi ni Khan.

Itataya ng 35-anyos na si Pacquiao (56-5-2, 38 KOs) ang kanyang hawak na World Boxing Organization (WBO) welterweight crown laban sa 30-anyos na si Algieri (20-0-0, 8 KOs).

Nauna nang nagpa­ramdam si Khan (29-3-0, 19 KOs) na gusto niyang la­banan si Pacquiao kung ma­bibigyan ng pagkaka­taon.

Bukod kay ‘Pacman’, tar­get din ni Khan, dating nag-ensayo sa Pilipinas ka­sabay ni Pacquiao, na ma­kasagupa si Floyd Mayweather, Jr. (47-0-0, 26 KOs).

Naniniwala si Khan na madodomina ni Pacquiao si Algieri sa kabila ng height at reach disadvantage ng Sarangani Congressman.

Determinado si Pacquiao na pabagsakin si Algieri para patunayang kaya pa niyang makapagpatulog ng kalaban.

Ang huling KO win na nai­poste ni Pacquiao ay noong 2009 laban kay Mi­guel Cotto na kanyang pi­nasuko sa 12th round pa­ra tangayin sa Puerto Rican ang suot nitong WBO welterweight belt.

Nauna nang sinabi ng 5-foot-10 na si Algieri na magi­ging agresibo siya sa ka­nilang upakan ng 5’6 na si Pacquiao taliwas sa na­unang pahayag ni chief trainer Freddie Roach na tatakbuhan lamang niya si ‘Pacman’.

“I’m gonna push the ac­tion, I’m going to utilize an authoritative jab and bo­xing stance and I’m going to go out there and set the tone. That’s how I fight,” ani Algieri.

Bumango ang panga­lan ni Algieri matapos talu­nin si Rus­lan Provodni­kov via split decision para aga­win sa Russian ang su­ot ni­tong WBO light welterweight belt no­ong Abril.

Si Provodnikov ay na­ging sparmate ni Pacquiao.