Pacman kayang talunin si M’weather--Roach
MANILA, Philippines - Matuloy man ang hinihintay na bakbakan nina Manny Pacquiao at Floyd Mayweather, Jr. sa susunod na taon ay madali nang tatalunin ng Filipino boxing superstar ang American fighter.
Ito ang opinyon ni chief trainer Freddie Roach kaugnay sa sinasabing pagbuhay sa negosasyon para sa Pacquiao-Mayweather super fight.
“He’s shot, he’s all done, his legs are gone based on his last two fights,” sabi ni Roach sa 37-anyos na si Mayweather.
Kamakailan ay sinabi ni Bob Arum ng Top Rank Promotions na payag ang pay-per-view networks na HBO at Showtime na plantsahin ang kanilang gusot para maitakda ang Pacquiao-Mayweather super fight sa 2015.
May kontrata si Pacquiao sa HBO, habang nasa bakuran ng Showtime si Mayweather.
“With Showtime and HBO wanting the fight and Manny wanting the fight, there is one little step to take and that’s to see where Floyd stands,” wika ni Arum.
Handa naman si Pacquiao (56-5-2, 38 knockouts) na labanan si Mayweather (46-0-0, 26 KOs) bagama’t tatlong beses umatras ang American five-division titlist.
“We’ll fight Mayweather at any weight. It doesn’t matter. Weight is not an issue with him. Whatever weight he wants to fight at --we’ll fight him,” sabi ni Roach kay Mayweather.
Nakatakdang itaya ni Pacquiao ang kanyang hawak na World Boxing Organization (WBO) welterweight crown laban kay American challenger Chris Algieri (20-0-0, 8 KOs) sa Nobyembre 22 sa The Venetian sa Macau, China.
Sasagupain naman ni Mayweather si Marcos Maidana sa isang rematch sa Setyembre 13 sa Las Vegas, Nevada. (RC)
- Latest
