Cone hinirang na PBAPC Coach of the Year
MANILA, Philippines - Si Tim Cone ang huling kumuha ng PBA Grand Slam at siya rin ang unang tao na muling nakagawa nito.
Labing walong taon matapos tulungan ang Alaska sa pagwalis sa tatlong komperensya noong 1996, nagbalik si Tim Cone sa Promised Land kasama si James Yap at ang San Mig Super Coffee Mixers para sa kanilang hindi malilimutang kampanya sa 39th season.
Makaraang magkampeon sa season-ending Governors’ Cup noong 2013, sinikwat ng Mixers ang PBA Grand Slam sa tulong ng dalawang maaasahang rookies.
Ngunit ang lahat ng papuri ay nararapat para kay Cone, nakuha ang nasabing mga tagumpay sa maikling panahon sa paggiya sa prangkisa.
Matatanggap ngayong gabi ni Cone ang kanyang reward sa pagtanggap ng Coach of the Year trophy sa 2014 PBA Press Corps Annual Awards Night sa Richmond Hotel sa Eastwood City sa Libis.
Ang Coach of the Year honor ay pangatlo ni Cone --kasama rito ang 1996 season--para maging unang coach na nakakuha ng dalawang PBA Grand Slam.
Ang tropeo ay ipinangalan kay legendary Virgilio ‘Baby’ Dalupan, ang winningest coach sa league history bago malampasan ni Cone sa pag-angkin sa All-Filipino conference nang maisubi ng 56-anyos na American ang kanyang ika-16 titulo.
Makakasama ni Cone sa limelight ng event na may temang ‘There Are Champions…and There Are Grand Slam Champions’! ay si San Miguel Corp. president at chief operating officer Ramon S. Ang na gagawaran ng Executive of the Year award.
Sina cage great Atoy Co at Alaska team manager Dickie Bachmann, miyembro ng Grand Slam teams mula sa iba’t ibang panahon, ang magsisilbing guest of honor na mangunguna sa pagpaparangal sa mga awardees sa formal rite.
- Latest
