Shakey’s V-league lady troopers makikisalo sa itaas
MANILA, Philippines - Matapos ang nabigong sweep, plano ngayon ng Army Lady Troopers na saluhan ang PLDT Home Telpad Turbo Boosters sa unang puwesto sa pagpapatuloy ng Shakey’s V-League Season 11 Open Conference sa The Arena sa San Juan City.
Kalaban ng Lady Troopers ang Ateneo Lady Eagles na magsisimula matapos ang tagisan ng National University Lady Bulldogs at Air Force-Air Spikers sa unang laro sa ganap na alas-2 ng hapon.
Kumpleto na ang anim na koponan na aabante sa quarterfinals sa ligang inorganisa ng Sports Vision at handog ng Shakey’s dahil ang UP Lady Maroons at PNP Lady Patrollers ay namaalam na sa magkaparehong 0-6 baraha.
Pero pukpukan pa rin sa mahahagip na panalo sa ligang may ayuda pa ng Accel at Mikasa dahil carry-over ang karta ng anim na aabante sa susunod na round.
Lumasap ng unang pagkatalo ang Army sa kamay ng nagdedepensang kampeon Cagayan Valley Lady Rising Suns para maisuko ang liderato sa pahingang Turbo Boosters (6-1).
Tiyak na magpupursigi sina Rachel Ann Daquis, Jovelyn Gonzaga, Mary Jean Balse, Nerissa Bautista at Tina Salak para makabangon agad.
Hindi naman puwedeng maliitin ang determinasyon ng Lady Eagles na natalo sa Lady Bulldogs sa huling laro.
Ang nangungunang scorer ng liga na si Alyssa Valdez ang mangunguna uli para sa Lady Eagles ngunit dapat na manumbalik ang sigla ng paglalaro nina Michelle Morente, Amy Ahomiro at Julia Morada para tumibay ang tsansang makuha ang ikatlong panalo matapos ang anim na laro.
Ikaapat na panalo matapos ang pitong laro ang nakataya sa mananalo sa NU at Air Force para masolo ang ikaapat na puwesto sa standings.
Sina Jaja Santiago at Myla Pablo ang magtutulong uli para sa Lady Bulldogs upang wakasan ang kampanya sa elims bitbit ang dalawang sunod na panalo.
Sa kabilang banda, nais ng Air Spikers na putulin ang dalawang dikit na kabiguan at sina Maika Ortiz at Joy Cases ang magdadala sa kanilang laban.
- Latest