Blatche, Gilas magkasama na sa training sa Miami
MANILA, Philippines - Umaasa si national head coach Chot Reyes na makakatulong sa kanilang paghahanda para sa darating na 2014 FIBA World Cup sa Spain ang kanilang four-day training camp sa Miami, Florida.
Lalo pa at kasama na nila si naturalized center Andray Blatche.
Sa ipinosteng litrato sa Twitter account ni head coach Chot Reyes na @coachot ay nakita ang 6-foot-11 na si Blatche kasama ang mga miyembro ng Nationals.
“Day 2 of Miami Camp now in d books #GilasRoad2Spain #PlayPinoy,” sabi ni Reyes sa kanyang Twitter matapos ang ensayo ng Gilas Pilipinas.
Hindi nakasama ang 6-foot-11 na si Blatche, naglaro sa NBA para sa Brooklyn Nets, sa kampanya ng Nationals sa nakaraang 2014 FIBA Asia Cup sa Wuhan, China kung saan nila kinuha ang bronze medal.
Ang nasabing four-day training camp sa Miami ay bahagi ng preparasyon ng Gilas Pilipinas para sa darating na FIBA World Cup na nakatakda sa Agosto 30 hanggang Setyembre 14 sa Spain.
Isa lamang kina Blatche at 6’11 naturalized player Marcus Douthit ang maaaring maglaro bilang naturalized player ng bansa sa FIBA World Cup base na rin sa patakaran ng basketball federation.
Kasama ng Gilas sa Group B ang Argentina, Croatia, Greece, Puerto Rico at Senegal.
- Latest