Eagles iiwas madungisan ng Bulldogs
Laro Ngayon
(Mall of Asia Arena,
Pasay City)
2 p.m. UST vs Adamson
4 p.m. Ateneo vs NU
MANILA, Philippines - Palalakasin pa ng Ateneo ang kapit sa unang puwesto sa pagpapatuloy ng 77th UAAP men’s basketball ngayon sa Mall of Asia Arena sa Pasay City.
Katipan ng Blue Eagles ang National University Bulldogs sa tampok na laro dakong alas-4 at puntirya ang ikaapat na sunod na panalo.
Huling pinabagsak ng tropa ni coach Bo Perasol ang UP Maroons, 86-75, at nagpatuloy ang magandang pagtutulungan ng mga beterano sa pangunguna ni Kiefer Ravena at mga baguhan tulad ni Arvin Tolentino.
Ang 6’4 forward-center na dating manlalaro ng San Beda ay gumawa ng 20 puntos laban sa Maroons upang magpatuloy ang pag-angat ng ipinakikita sa koponan.
“Alam ko na malaki ang kanyang potential at may ilalabas pa siya,” wika ni Perasol kay Tolentino.
Pero hindi lamang si Tolentino o Ravena ang dapat na gumana ang kamay kundi pati ang iba pang kasamahan dahil ang NU ay magsusumikap na bumangon matapos ang 55-57 pagkatalo sa La Salle sa huling laro.
Sina Alfred Aroga, Joshua Alolino at Jett Rosario ang mga magtutulong para sa koponan ni coach Eric Altamirano para manatili sa ikatlong puwesto.
Ikalawang sunod na panalo ang balak lapain ng UST Tigers sa pagbangga sa Adamson Falcons sa un- ang laro sa alas-2 ng hapon.
Sinorpresa ng Tigers ang FEU sa huling laro, 69-67, para matabunan ang pagkatalo sa NU, 40-59, sa unang laro.
Ang mga beteranong sina Kevin Ferrer at Karim Abdul ang mga mangunguna sa Tigers pero dapat na makitaan pa ng mas magandang numero si Aljon Mariano upang maipakita ng tropa ni rookie coach Segundo dela Cruz na palaban pa rin sila kahit wala na ang dating scorer na si Jeric Teng. (ATan)
- Latest
