UAAP Men’s CAGEFEST; Eagles, Bulldogs pakay ang ika-3 dikit na panalo

MANILA, Philippines - Ipagpapatuloy ng Blue Eagles ang kanilang pag­lipad sa pamamagitan ng pag-angkin sa kanilang ikatlong sunod na panalo.

Sasagupain ng Ateneo De Manila University ang University of the Philippines ngayong alas-2 ng hapon kasunod ang banggaan ng nagdedepensang De La Salle University at National University sa alas-4 sa 77th UAAP men’s basketball tournament sa Mall of Asia Arena sa Pasay City.

Magkasalo sa liderato ang Ateneo, NU at University of the East sa kanilang magkakatulad na 2-0 record kasunod ang Far Eastern University (1-1), University of Sto. Tomas (1-1), La Salle (0-2), Adamson University (0-2) at UP (0-2).

Tinalo ng Blue Eagles ang Falcons, 79-57, at ang Green Archers, 97-86, sa likod ng mga averages na 25.5 points, 4.5 rebounds, 3 assists at 2.5 steals per game ni Kiefer Ravena.

“Malayo pa talaga,” wika ng dating UAAP Rookie of the Year awardee. “There are a lot of things that can happen this season, so we have to take it a game at a time.”

Target naman ng Fighting Maroons ang kanilang unang panalo.

Sa ikalawang laro, pu­puntiryahin ng NU ang ka­nilang pangatlong dikit na panalo, samantalang pipilitin ng La Salle na mawakasan ang kanilang dalawang sunod na kamalasan.

Umiskor ang Bulldogs ng 70-59 panalo laban sa Fighting Maroons para sa kanilang ikalawang dikit na arangkada.

Nakalasap naman ang Green Archers ng 86-97 kabiguan sa Blue Eagles.