EDITORYAL - Kasalanan ng LTO

Walang dapat sisihin sa pagdami ng mga bulok na sasakyan sa buong bansa kundi ang Land Transportation Office (LTO). Dahil rehistro nang rehistro ang LTO ng mga sasakyang kakarag-karag particular na ang mga jeepney at truck, pinalubha nito ang trapik at ang air pollution. Paggrabe nang paggrabe ang trapik ngayon at maraming nasasayang na oras at pera. Ayon sa report, bilyong piso ang nasasayang araw-araw dahil sa trapik.

Ang mga bulok na jeepney ang pinagmumulan nang nakalasong usok at unti-unting pumapatay sa maraming Pinoy. Maraming sakit ang nakukuha sa maitim na usok ng mga sasakyan lalo sa jeepney at truck. Maoobserbahan sa umaga ang grabeng air pollution. Masyadong makapal ang usok sa umaga na maski ang araw ay hindi makatagos. Ang usok na ito ang nalalanghap ng mamamayan at nagdudulot ng mga sakit na nauuwi sa kamatayan.

Ang LTO ang may kasalanan nang lahat na ito. At dahil sila ang may kasalanan, dapat tumulong sila kung paano wawalisin sa kalsada ang mga bulok na sasakyan. Huwag nang irehistro ang sa tingin nila ay bulok at kakarag-karag. Madali namang makilala kung bulok ang sasakyan lalo na ang jeepney. Nanlilimahid ang mga jeepney, walang ilaw sa harapan, pudpod ang mga gulong at walang preno.

Noong nakaraang linggo, ipinatupad na ng Metro Manila Development Authority (MMDA) ang “Tanggal Bulok, Tanggal Usok”. Maraming bulok na jeepney ang hinuli. Kahapon, pinagpatuloy ng MMDA ang kampanya para mawalis ang mga karag-karag na sasakyan. Sana tumulong ang LTO sa MMDA sapagkat sila naman ang may kasalanan kung bakit dumami ang mga bulok na sasakyan sa kalsada.

Sana, hindi pakitang-tao lang ang ginagawa ng MMDA na pagwalis sa mga bulok na sasakyan. Itodo na ito para mabawasan ang trapik, air pollution at aksidente.

Itigil naman ng LTO ang pagrehistro sa mga sasakyang 15 taong gulang pataas. Huwag nang hayaang makapasada pa ang mga ito. Panahon na para mawala ang mga nagdudulot ng problema sa bansang ito.