‘Padri-padrino lang; Estafa Queen agad nakalaya’
NATATANDAAN n’yo pa ba ang Estafa Queen na si Gina Ong Tan? Makailang beses na siyang lumabas sa Kilos Pronto dahil sa dami ng reklamo laban sa kanya.
Ilang beses na rin siyang nailathala sa kolum ko dito sa Pilipino Star NGAYON at maging sa PM PangMasa.
Siya ‘yung may mala-anghel na mukha at di maikakailang ganda pero asawa yata ni Satanas ang bruha dahil sa tindi ng kanyang mga modus.
Si Gina Ong Tan din ‘yung nambiktima ng ilang kilalang artista at malalaking negosyante sa kanyang mga negosyo kuno. Namataan siya sa Landers sa Balintawak ng isa sa kanyang mga biktimang lumapit sa aking tanggapan.
Agad itong itinawag sa aming mga staff at Kilos Pronto naman kaming nakipag-ugnayan sa Criminal Investigation and Detection Group (CIDG) ng Camp Karingal.
Hulog sa Bitag ang bruha, dakong 4:30 ng hapon sa bisa ng warrant of arrest na hawak ng mga nagrereklamo.
Gumaan na sana ang loob ng kanyang mga biktima dahil sa kulungan magpa-Pasko si Estafa Queen pero here’s the surprising part, bailable ang kaso, P200,000.
But wait there’s more, on the spot, nakapagpiyansa ang kolokay! Kampon talaga ni Taning ang bruha. Eto ‘yung mga istorya ng mga dorobong milyun-milyon ang nakamal sa mga biktima pero sa halagang P200,000 lang ay agad makakalaya.
May mga umaarbor sa hinayupak na Estafa Queen na ito eh. May mga pumapader at talagang ginagawan ng paraan na mailusot ang kanyang kaso.
Iba talaga ang mga kawatang may kakayanang magpiyansa at malakas ang kapit kaya mabilis makawala sa pananagutan at sa batas. Ganoon lang kadali, tsk tsk tsk.
- Latest
